Skal driva kaféen i Guddal

– Det berre skjedde eigentleg. Vi kjenner dei som dreiv her i fjor, og dei tipsa om at det var ein oppleving å driva her. Det høyrdest jo fantastisk ut, men er ikkje noko ein berre seier ja til med ein gong, fortel Amalie.

Etter litt tenking og diskusjon vart paret einige om at dei ville prøva seg på kafédrift. Dei tok kontakt med Gøril og fekk jobben med å driva kaféen.

– Etter at vi bestemte oss og fekk kontakt med Gøril gjekk det veldig fort til vi signerte kontrakt. Vi har jo aldri drevet noko sjølv, og vi visste det var mykje arbeid, men det er verkeleg mykje arbeid, ler Amalie.

Dei to har kanskje ingen erfaring med drift, men begge har erfaring ifrå bransjen. Amalie har jobba som servitør og hushjelp på Rosendal Turisthotell og Spiskammerset.

– Det er heilt annleis å driva noko, det ein ikkje ser når ein jobbar for nokon er alt det administrative og all planlegginga som går med, seier ho.

Travel sommar

Å driva noko ilag som kjærastar kan vera ei utfordring, men paret har allereie fått prøvd seg på litt forskjellig.

-Vi har hatt nokre arrangement på låven, no til helga er det til dømes akvarellkurs på garden og då er det vi som stillar med lunsj og kaffi. Og så har vi jo hatt ope laurdag og sundag sidan påsken, då Gøril opna sin 30-års jubileumsutstilling, seier Amalie og legg til;

– Då var det mykje folk, herlighet. Det var meg og ei til i kassen og det var kø ut døra. Eg hadde vore bortreist veka før og hadde ikkje høve til å baka, men heldigvis fekk eg hjelp av Stine Nerhus. Ho stilte med utruleg god gulrotkaka, og vi selde ut alt saman, seier Amalie.

Frå 17.juni vert det ope kvar dag i kaféen, og Amalie skal kombinera fulltid i kaféen med fulltid i sin andre jobb på omsorgsbustad på Varaldsøy.

– Eg er vekke ei veka om gongen, og så heime i to veker. Så eg skal gjere begge deler. Men når eg er på Varaldsøy har eg jo litt fritid òg, og kan gjera litt administrativt, som til dømes bestillingar av rom og slikt, fortel Amalie, og legg til;

– Vi har to rom over kaféen som vi kan leiga ut, eg håpar at folk nyttar seg av dei. Det er noko heilt eige å vakna opp her i huset og sjå utover plassen.

Heimekoseleg og historisk

Kaféen i Guddal er i eit gamalt hus som tidlegare sto i Rosendal og som har vorte flytta opp på garden. Her kan ein sitja i ei koseleg gamal stove og sjå utover det historiske tunet.

– Det er noko eige det Gøril har skapt her. Ikkje berre er det heimekoseleg, men historia til garden og dette huset gjer det ekstra artig. Eg synest det er veldig flott korleis det er blitt tatt vare på, seier Amalie.

Ho gler seg til å ta ordentleg fatt på sommaren, og håpar at det er mange lokale og turistar som tek turen til Guddal.

– Det er ekstra kjekt med gjestar på ein så fin plass, alle som kjem inn synes det er så fint her. Det er ein veldig fin og koseleg arbeidsplass. Og så er jo Gøril heilt super, eg er veldig glad for å få jobba ilag med ho, seier Amalie.

Førebels skal Amalie og kjærasten driva kaféen i ein sesong, men Amalie utelet ikkje at dei kan bli i fleire år.

– Det må vi berre ta ein vurdering på etter sesongslutt, avsluttar ho.