– Skal det vera mogleg?

Eventyret er basert på ei sann historie, og Una Kolle kan nesten ikkje begripa kor bra festivalhelga vart.

Med strålande sol, eit gromgodt knippe artistar, eit lukkeleg publikum og ein gjeng med heilt fantastiske frivillige er det ikkje måte på kor vellåtande festivalsjefen er då Grenda ringer for ein oppsummerande kommentar på måndag føremiddag.

– Det er vanskeleg å beskriva, men me er jo kjempenøgde med helga. Dei frivillige har vore utruleg flinke. Det har berre vore godord å hausta frå vaktselskapet, som også meinte at dei frivillige var kjekke å jobba med. Det har vore lite trøbbel og veldig god stemning. Alt i alt, med vêret, stemninga, artistane, publikum; det har vore eit eventyr for oss, seier ho.

Vidare understrekar ho at det vart travelt på dei frivillige, mellom anna grunna nokre tekniske problem med betaling, samt med litt for få folk i bar og matservering.

– Dette gjorde at det bygde seg opp litt kø, og då var det all hands on deck. Etter helga hadde Tommy (Persson i Bra Lunsj, red. anm.) rundt 100 burgarar att, og på øl-fronten måtte me ha ny forsyning laurdagen, både med øl og glas. Heldigvis har me flinke folk i organisasjonen som kunne snu seg rundt og få tak i det me trengte, held festivalsjefen fram.

Steppa inn som trailersjåfør for Madrugada

Det var over 300 frivillige i sving, i tillegg til festivalstyret. Likevel måtte dei lysa etter fleire trælar på laurdagen.

– Det var ein del korona-fråfall faktisk, så det kom nokre avmeldingar frå folk som var blitt sjuke.

Ein av dei som måtte melda avbod grunna korona var ein av sjåførane som skulle frakta utstyret til Madrugada frå Kvinnherad til Steinkjær. Dette førte til at konserten med Madrugada vart flytta fram på fredagskvelden, og den som vart med til Steinkjær i semitraileren var Trond Håvard Skjelnes.

– Han var med som frivillig på scenerigg. Men då Madrugada sto med ein sjåfør i manko, spurte me Trond Håvard om han kunne tenka seg ein tur til Steinkjær, og ja, det kunne han. Så han tok med seg motorsykkelen sin i traileren og vart med oppover. Så køyrde han heim att i går, og både han og bandet var strålande nøgde, fortel Kolle blidt.

På telefon kan Skjelnes stadfesta at det vart ein fin tur.

– Ein må jo hjelpa til når nokon treng det. Så eg spurte om eg kunne ha motorsykkelen baki, og der var det akkurat plass. Då var det berre å reisa! Så eg hadde ein veldig fin tur opp, desse karane var jo verkeleg trivelege og kjekke, fortel han blidt, før han held fram:

– Og turen heim gjekk også veldig fint. Eg hadde meg ei overnatting i Oppdal, og det var litt byger, men regnet kom eigentleg ikkje før eg kom til Lofthus. Nei, det blei veldig bra dette!

Takksame

Sjølv om det ikkje er Festidalen sitt ansvar å stille med sjåfør-vikarar, var det veldig kjekt å kunne hjelpe til.

– Me er veldig takksame, både for våre frivillige, for publikum og for artistane. Me har jo verdas vakraste festival, og det er det fleire av artistane som også har sagt, både frå scena og på sosiale medium no i helga.

Meldinga frå Gabrielle, som avslutta herlegheita på laurdag kveld, var som følgjer:

«Ok, så har me nettopp spelt på ein av Norges vakraste stader. Tusen takk Festidalen!»

Ein av dei døde i Oslo var frå Kvinnherad

Dekorerte jordet med regnbogefargar

Men helga bar ikkje berre med seg god stemning.

– Etter det som skjedde i Oslo natt til laurdag fekk me behov for å markera vår støtte, det var viktig for oss. Me fekk difor hengt opp Pride-flagg og fekk tak i sminke, og me fekk også inn ein slide til presentasjonen vår i løpet av laurdagen, fortel Kolle.

Pride-effektane kom frå Karl Petter Vårdal i Human etisk forbund i Kvinnherad, og markeringa vart godt motteke av publikum.

Og det endelege publikumstalet som fekk nyta verdas vakraste festival var 2600 på fredagen og 2800 på laurdagen.

Klare for neste eventyr

– Skulle det vera mogleg? Med det vêret me fekk vart det jo ekstra kjekt!

– Så no er de klare for Festidalen 2023?

– Ja, me har allereie sett datoen! Me reknar med å få ut billettane ganske snart, kanskje allereie denne veka, sluttar Kolle.

Allereie no kan ein såleis merka av jonsokhelga i almanakken for 2023. Då skal eit nytt eventyr skrivast.

– Gåsehud