Skal delta på feiringa av Kristenretten

På nettsida «Moster2024» vert Kristenretten omtalt slik: «Kristenrett er ei samling av dei reglane ein må følgja for å leva eit kristent liv. Kristenretten vedtatt på Moster i 1024 innehaldt difor reglar om alt frå dåp og gravferd, om faste og kyrkjebygging, om heilagdagar og gjerehald rundt kyrkjegarden, til pliktene til biskop og prestar, og om trolldom».

Då ordførar Vegard Bjørnevik (H) deltok i Sunnhordland prosti si nyttårsmottaking i Nysæter kyrkje på Stord, var jubileet eitt av temaa.

– Prosten var innom at 2024 er eit veldig spesielt år for landet vårt. I år er det tusenårsjubileum for Kristenretten og starten på rettsstaten og demokratiet Norge. Ordførar er allereie påmeldt jubileet som skal vera på Moster i sommar. Kristenretten står sterkt i landet vårt, sa Bjørnevik, og la til at jubileet sitt mantra er «Feira fortida og forma framtida».

Den store feiringa føregår frå slutten av mai til byrjinga av juni, og byr på eit omfattande kulturprogram, seminar, vikinglandsby, og katolsk midnattsmesse i Moster gamle kyrkje.