Sjørøvarane sjarmerte til gagns
Fredag hadde barnekoret Perlene premiere på musikkteateret «Skatten på sjørøverøya», og sjarmerte både landkrabbar så vel som herda sjøulkar fullstendig i senk.
Alle dei spente skodelystne vart ynskja velkomen av dei hardtarbeidande kro-innehavarane og søskenparet «Emma» og «Tim» med både song og ei skrøne som tok oss med djupt inn i sjørøvarlivet på Halsnøy.
Derifrå kom songane som perler på ei snor med artige og kvikke replikkvekslingar imellom, og tok publikum med på ei spanande reise heilt frå krevjande krogjester til farlege sjørøvarkapteinar, mytteri og ikkje minst Halsnøy sin eigen osteelskande Tom Hanks-pirat i god «Castaway»-stil.
Annonse
Mange var vittigheitene som fall i god jord hjå dei vaksne i salen, samtidig var det spanande også for dei yngre å fylgja med på. Talet på alle småfeil og bommertar er imponerande lite med tanke på skodespelarane og songarane sin unge alder. Tvert i mot sjarmerte dei meir for kvart fnis og smil når dei eigentleg skulle halda seg alvorlege eller kvar gong dei fekk kviskrande hjelp til neste replikk.
For eit show, for nokre talent og for ein kveld.
Nesten to år
Etter at det heile er over strålte både Merethe Normann og Maria Johnsen Hansen av glede og stoltheit over ein vel gjennomført premiere, og det med rette.
Annonse
– Dette gjekk veldig bra, dei «naila» det. Me har jobba med dette i nesten to år heilt frå den spee byrjinga. Dette var heilt fantastisk, understreka Hansen smilande frå øyra til øyra.
– Ja, dei «naila» det. Dette var heilt imponerande, eg vil berre grina, la Normann leande til.
Normann fortalde vidare om nokre intensive siste veker.
– Det er jo noko me har jobba med lenge, og mange av songane har me hatt på plass sidan i sommar. Me fokuserte fyrst på songane, før me tok for oss teksten seinare. Me hadde ein liten pause frå det heile før jul, men trappa opp att no i januar og februar, forklarte ho.
– Men trass i mange timar med øving har me også passa på å kosa oss mykje med både pizza og middagar, la ho til.
Premieren er over, men noko premierefest vart det ikkje.
Annonse
– Me skal ikkje det i kveld, me vil ha dei opplagde til neste førestilling i morgon. Og i morgon skal me rydde, men me skal samlast på onsdag, avslutta dei engasjerte kordirigentane.
