– Sjølvsagt blir det premie for størst og minst fisk

Éin gong i månaden skipar Folgefonnsenteret til forskarkafé, og torsdag 11. mai har dei invitert professor Kerim H. Nisancioglu frå Universitetet i Bergen til å halda føredrag om «Hardangerfjorden ut av istida».

– Forskarar ved Universitetet i Bergen og Bjerknessenteret for klimaforskning har over lengre tid studert tilbaketrekkinga av isen i Hardangerfjorden og funne at dette skjedde ekstremt snøgt mot slutten av siste istid. I dag ser me det same utfolda seg i fjordane på kysten av Grønland og kan såleis bruke kunnskapen frå Hardanger til å betre framskrive framtidas endringar i fjordane der, seier professoren sjølv om føredraget i pressemeldinga.

Fiskekonkurranse

Laurdag 13. mai kan du og resten av familien hive dykk med i fiskekonkurransen på kaia i Rosendal. Saman med Barnas turlag Kvinnherad sørgjer dei for at det ikkje berre blir konkurranse, men også andre kjekke aktivitetar undervegs. Born må vera i fylgje med ein vaksen for å melda seg på i konkurransen, skriv dei i pressemeldinga.

– Sjølv om ikkje arrangementet er lagt opp etter «tidevannstabellen» håpar me på god bet i fisken og mange ivrige deltakarar. Og sjølvsagt blir det premie for størst og minst fisk, avsluttar dei.