Sjokkforslag: Føreslår å ta bort ei ferje frå både Årsnes og Ranavik
Vestland fylkeskommune må spara pengar på kollektivtilbodet. I dag vart det lansert eit forslag som sterkt vil råka Kvinnherad.
Publisert
Sist oppdatert
Fylket sitt Hovudutval for samferdsel og mobilitet har tysdag og onsdag møte i Sogndal. Onsdagen starta med at fylkesadministrasjonen heldt ei orientering om budsjettet for 2025. Eine posten hadde overskrifta «Ferje – redusert tilbod». Det handlar om at fylket vil spara 22,5 millionar kroner neste år på ferjedrifta. For å greia dette kjem administrasjonen med forslag til tre tiltak:
• Innstilla sambandet Kinsarvik-Utne. Effekten i 2025 vert på 11,5 millionar kroner. I heile 2026 vil ein spara 19 millionar.
Annonse
• Redusera frå to til éi ferje på sambandet Ranavik-Skjersholmane. Effekten i 2025 utgjer 5,5 millionar kroner. Heilårseffekten frå 2026 er på 11 millionar kroner.
• Redusera frå to til éi ferje på sambandet Gjermundshamn-Varaldsøy-Årsnes. Effekten neste år er på 5,5 millionar kroner. Heilårseffekten frå 2026 er på 11 millionar kroner.
Det må understrekast at dette er administrasjonen sitt forslag. Saka har ikkje vore til politisk behandling enno, og det er nok å forventa at innspelet vil skapa heftig debatt.
