Sjampofabrikk og fiskeskit gav finaleplass

Oppgåva Kvinnherad-skulane fekk var å finna noko ein kunne bruka avfallsprodukta etter oppdrettsbransjen til. I det låg det eit breitt spenn elevane kunne plukka frå, som tau som skulle bytast ut, fiskeskit, bildekk og øydelagt plast, fiskenót, blåser og trevirke, for å nemna noko.

– Det var berre til å kopla på kreativiteten og ta seg ut, seier kontaktlærar for 6. klass ved Omvikdalen skule Tina Skår.

Nitrogen

Dei 15 elevane i hennar klasse fordelte seg på tre grupper og naus i oppgåva.

– Tidlegare år har det vore fleire skular påmeldte, og ein har då hatt finalar på kvar skule, og så samla skulevinnarane til ein finale i kommunestyresalen. I år var det berre våre tre lag og tre lag frå Uskedalen påmeldt, så alle seks fekk koma og presentera sine prosjekt for juryen, forklarer Skår.

Juryen i år var mellom anna ordførar Vegard Bjørnevik, saman med Georg André Melcher frå Lingalaks og Sara Nonås Langhelle frå Folgefonnsenteret.

I Omvikdalen tok kreativiteten elevane i ulike retningar. Den eine gruppa laga seg ein leikeplass som nytta seg av avfallet og delar som skulle bytast ut frå oppdrettsanlegget. Gruppe 2 hadde slått seg inn på flytebrygger, som dei nytta om att både blåser, dekk og gamalt trevirke for å laga.

Den siste gruppa tenkte stort, nytt og delvis medisinsk. Det som vart vinnarprosjektet kalla seg for Fisk & Sånt, og laga eit konsept for å trekkja ut nitrogen av fiskebæsjen, putta den ekstra nitrogenen inn i ein sjampo.

160 arbeidsplassar – minst!

– Kvifor fiskebæsj i sjampo? drista lokalavisa seg til å spørja.

– Me har oppdaga at det er ein hårsjukdom som heiter alepecia areata, der ein mistar håret, og ein behandlingsmetode er å tilføra ekstra nitrogen. Me vil reinska bæsjen til fisken, henta ut nitrogen og gje dei som har mista håret ein sjampo som dei får medisinen gjennom, forklarer Trygve Falk på vegner av gruppa.

– Flaskene vil me laga ved å resirkulera plast frå oppdrettsanlegget, poengterer Oskar Haugse.

Energien til å driva fabrikken skulle dei skaffa ved å biogass av fiskebæsjen.

– Me tenkte først å laga eige kraftverk, men han fyren frå Linga Laks tipsa oss om biogass, så me har baka det inn, sa Joakim Bakke Skåle.

– Denne fabrikken treng minst 160 tilsette. Minst! seier Oskar.

Om det var akkurat det momentet som overtydde juryen om at dei stod føre vinnarprosjektet, skal vera usagt, men ordføraren var visst høglytt begeistra for konseptet då han høyrte talet arbeidsplassar det ville skapa.

– No skal me finpussa på videoen som skal sendast inn til fylkesfinalen. Kristian har redigert videoen, me har jobba med logoen og me har fått med litt idear frå dei andre konsepta, sluttar gutane på gruppa.

3. mai går fylkesfinalen av stabelen. Då står det att å sjå kva juryen tenkjer om hårsjukdom, sjampofabrikk med biogassanlegg og flasker av resirkulert plast. Det er mest uråd å tenkja seg at det ikkje skal bli høgt verdsett også på fylkesnivå.