Sjå «Vind Auge» i Kunsthall Stavanger

Utstillinga har fått gode kritikkar i det noko amputerte utstillingsåret 2021, og verket «Vind Auge» har tydeleg opna for ymse assosiasjonar hos publikum. Bergens Tidende sin kritikar meinte til dømes at Løland sitt verk minna om ein kvinnekropp, dansande på berre bein, men at det også hinta til «auge som kikar fram mellom tynt gjennomsiktig tøy.»

Desse assosiasjonane er i tråd med tankane kurator, Heidi Bjørgan, har gjort seg då utstillinga er sett saman. Ønskjet hennar har vore å skape ei underfundig og sær stemning lik den som finst i ein David Lynch-film.

– Stemningar knytt til merkelege og draumeaktige scenar, eller sensuelle og forførande. Tvitydige stemningar der venleik og uhygge går hand i hand. Under ei perfekt overflate lurer gjerne død og elende, samstundes som noko rørande og vakkert kan gøyme seg i noko som ser forderva og øydelagt ut, skriv Bjørgan om utstillinga.

Vestlandsutstillingen er ei årleg utstilling med verk av kunstnarar som er tilknytt Vestlandet, og skal spegla samtidskunstscena i regionen. Det var 311 søkjarar til årets utstilling, og Løland er ein av femten utvalde kunstnarar.

Utstillinga er å sjå i Kunsthall Stavanger fram til 31. oktober.