Sjå kommuneoverlegen si koronaoppdatering her

Kommuneoverlege Glenn André Opland har kome med ei oppdatering om smittesituasjonen, omikron-varianten og nye råd og tiltak.

Kvinnherad kommune har denne veka sendt frå seg ein prøve til Bergen med mistanke om omikron. Det viste seg å vera deltavirus.

– Vi har ingen påviste omikron per no. Vi hadde ein test som var inne til sekvensering med mistanke, men det viste seg å vera deltavirus, seier kommuneoverlege Glenn André Opland i ei videooppdatering torsdag.

113 sidan 12. november

Her snakkar han om ein smittesituasjon i Kvinnherad som ser ut til å ha roa seg, og om nye råd og tiltak.

– Før den 12. november hadde vi totalt 105 smittetilfelle gjennom pandemien i Kvinnherad. Sidan den gong har vi fått 113 nye. Altså så har det vore ganske intensive veker. Smitten har fordelt seg hovudsakeleg i tre utbrot; Malanger, Husnes ungdomsskule og Halsnøy skule. I tillegg har det vore enkelttilfelle av importsmitte og utbrot i familiar. Men no ser det ut til å ha roa seg enn så lenge, seier Opland.

– Vaksiner deg

Frå midtnatt torsdag vart tiltaka som statsminister Jonas Gahr Støre la fram tysdag gjeldande. Opland fortel at det viktigaste no er å vaksinera seg.

– Er du uvaksinert, vaksiner deg. Har du berre ein dose og har indikasjon for to, ta to. Har du indikasjon for tre, ta den tredje. Vaksiner deg! Det er den beste beskyttelsen vi har. Vaksinen hjelper mot alvorleg sjukdom, både ved infeksjon av deltavirus og etter alle solemerke også for omikronviruset, seier Opland og held fram:

– Den andre tingen som er veldig viktig: hald deg heime om du er sjuk, og test deg.

Når det kjem til testing så har Kvinnherad kommune eit stort forbruk av hurtigtestar.

– Det er i utgangspunktet bra, men det viser seg at vi ikkje får tilsendt så mange hurtigtestar vidare. Dette er ikkje noko vi kan bestilla sjølv, det blir sendt ut frå sentralt hald ut i frå tal innbyggjarar og smittetrykk, og no er ikkje vi så mange innbyggjarar og vi har heller ikkje så stort smittetrykk. Då får vi heller ikkje så mange testar. Det er difor veldig viktig at det berre er hushaldsmedlemer, nærkontaktar og dei med symptom som tek kontakt og hentar seg testar, og at dei ikkje tar med seg fleire testar enn nødvendig, seier Opland.

– Seink skuldrane

Frå i morgon av vil kommunen avgrensa utleveringstida for hurtigtestane. Informasjon om dette vil dei fortløpande leggja ut på kommunen sine sider.

Avslutningsvis kjem kommuneoverlegen med ei klar oppmoding til innbyggjarane.

– Oppi alt dette her så er det snart jul. Prøv å seink skuldrane, dropp takvasken og hekleponchoen til svigermor kan venta. Fyr heller i peisen og ta deg eit krus gløgg og to ekstra, så får vi kryssa fingrane for at vi slepp fleire greske bokstavar på ei stund, seier Opland.