Siste sjekk før kodetesten

VM er kanskje å dra til litt, men Skarveland-elevane skal delta i verdas største teknologi- og kunnskapskonkurranse, og dei kan hamna i den nasjonale filane i Oslo. Og nokre av laga som kjem dit, skal til verdsfinalen.

I to månader har dei etter beste evne perfeksjonert koding, innovasjon og forsking. Laurdag reiser dei til Odda for konkurrera mot eit 20-tals andre lag. Onsdag var laga Skarveland Energi og Kvinnherad Energi og Koding gjennom sin generalprøve i Newtonrommet ved Hydro Husnes.

Generalprøvenerver

Sjølve kodinga av robotane speler ei stor rolle for korleis det går i konkurransen, men det heile skal også presenterast på godt vis, noko begge lag fekk høve til å gjera føre eit publikum som ikkje berre var kjensfolk. Fleire tilsette ved Hydro Husnes tok seg tid til å gjera generalprøven så lik på konkurransedagen som det lét seg gjera.

På robotarenaen kjempar David Holmedal og Ernst Skarveland ein liten kamp med å få roboten til å gjera som han skal.

– Me har programmert alt på førehand, men det funkar ikkje heilt, seier Ernst og David når batteripakkane dei skal henta ikkje legg seg fint i korga, slik som dei har planlagt.

– No ser eg kva me har gjort feil! Me har sett korga midt på. Ho skal vera på sida, oppdagar David, og ser at justeringa på legoroboten gir umiddelbar suksess.

Lagleiar Luna Gravdal, som har som viktigaste oppgåve å hjelpa dei andre og vera støttande for dei andre elevane på gruppa si, pustar letta ut.

Sjølv skal ho straks inn for å presentera konseptet og førebuingane som Kvinnherad Energi og Koding har gjort. Det gjer ho saman med lagkameratane Oda Haugland Langeland, Mathea Askeland og Aleksander Heimvik. Under presentasjonen koplar dei seg sterkt mot berekraftsmåla til FN.

– Behovet for rein energi er stort, og aller størst i Afrika, forklarer Mathea til tilhøyrarbenken, og påpeiker også at forureining gir dødsfall dødsfall i heimane, spesielt i Afrika.

TikTok?

Torjus Rusten Hermannsen og Marcus Holmedal tar tilhøyrarane gjennom problemstillingane som Skarveland Energi har jobba seg gjennom. Ei av dei viktigaste er korleis ein skal læra ungdom å spara straum.

– Det er få ungdommar som veit kor mykje straum dei bruker. Undersøkinga me gjorde var viste at filmar på TikTok vil vera den føretrekte måten ungdommar ville læra korleis dei kan spara, fortel Torjus frå deira rykande ferske undersøking.

Heile generalprøven blir ei god gjennomkøyring for dei to laga. Sjølve robotkodinga byr også på nokre strategival for kodarane.

– Me har 2,5 minutt på oss til å gjera dei ulike oppgåvene på banen. Me har valt å prioritera nokre av oppgåvene, slik at me er sikre på å få til nokon av dei, og dermed plukka med oss litt poeng. Då har me valt å løysa nokre av oppgåvene som ligg nær kvarandre, fortel Ernst og David.

Dei følgjer nøye med på at roboten vippa lego-tven på plass, at han tar med seg ein batteripakke frå ein stasjon og bort til vindmølla, der roboten hentar tre nye batteripakkar. Når dei no har fått plassert korga på rett plass går det heile langt betre.

Når startskotet går i Odda på laurdag, så får ein håpa at korga er rett plassert enno ein gong. Det er ikkje berre elevane som er spente. Det er definitivt Newton-lærarane Helena Espevik og Mathias Zimmermann også.

– Det er litt som når du som trenar har snakka til fotballaget ditt før kampen, og så byrjar kampen og du kan ikkje gjera så mykje frå eller til. Men du er veldig spent undervegs, seier Zimmermann.

Så står det på laurdag att å sjå kodinga, bodskapen og presentasjonen til laga når opp. Elevane har uansett hatt det både kjekt og lærerikt på vegen dit.