Siste møte før pappaperm – Vaage overtek

Kommunestyret hadde torsdag oppe saka om å formelt gje ordførar Vegard Bjørnevik (H) fritak for å gå inn i foreldrepermisjon i perioden 3. februar til 18. mai.

– I dag er det for ordføraren sin del det siste kommunestyremøtet, viss alt går som innstillingane seier - eg skal ikkje forskottera noko. Eg vil i alle fall nemna at eg skal i pappaperm frå februar, og sjølv om eg gler meg til det, så blir det òg trist å vera vekke frå dåke i den tida, sa Bjørnevik då møtet starta.

Han kunne sjølvsagt ha forskottert vedtaket, for det vart samrøystes bestemt å gje permisjon. Det vart heller ikkje lagt inn eit ekstra kommunestyremøte i januar, sjølv om det vart føreslege då neste års møteplan vart handsama.

– Eg trur ikkje Kvinnherad har hatt ein ordførar i pappaperm før, så det er jo historisk, opplyste Bjørnevik etterpå.

– Eg ynskjer ordføraren lukke til i pappapermen. Det blir ei fin oppleving, kommenterte Synnøve Solbakken (Ap).

Gode klemmar

Også Inger-Elin Nesheim (KrF) hadde ei helsing til Bjørnevik.

– Eg vil nytta høvet til å ynska ordføraren ei kjempefin tid i farspermisjon, og håpar dåke som nybakt familie får gode stunder saman med god tid, frisk luft og gode klemmar, og ikkje så altfor mange grytidlege morgonar. Hels den nye, vesle familiesjefen din og kjærasten din frå alle oss i Kommunestyret, smilte ho.

– Tusen takk, eg vart litt rørt no, svarte Vegard Bjørnevik.

Til Grenda presiserte halsnøybuen at det er med litt todelte kjensler han vert så lenge borte frå det politiske livet

– Det blir kjekt å vera med Gustav og prøva å ta del i det han driv med, slik ein moderne mann skal. Samstundes er det veldig kjekt å vera ordførar. Men sånn er det, og eg skal i alle fall ikkje vera nokon 7. far i huset, filosoferte han.

Mykje som skjer

I same møte vart det bestemt at Thea Vaage (Ap) rykkjer opp frå dagens verv som varaordførar og skal fungera som ordførar desse 15 vekene.

– Korleis blir det med Thea Vaage som ordførar?

– Eg har veldig tru på det. Ho har god erfaring og flinke folk rundt seg, både politisk og i administrasjonen. Og så kjem eg tilbake kjempemotivert den 18. mai, slo Vegard Bjørnevik fast.

I tillegg til dei 15 vekene ho skal vera ordførar, har Thea Vaage også teke permisjon frå jobben som lærar på Valekrossen skule i to veker før 3. februar og éi veke etter 18. mai. Dette for å få ein mjuk overgang med Vegard Bjørnevik.

– Det blir jo veldig spennande. Det er mange saker som skal opp i Kommunestyret og mykje som skjer. Kanskje kjem arealplanen opp til handsaming, og høyringsuttalen (om kraftlinjene) kjem opp, sa ho til Grenda.

VM på ski

Vaage får også eit spesielt oppdrag, av ein heilt annan karakter enn det vanlege ein ordførar gjer på.

– Eg skal til VM på ski i Trondheim, for der er alle ordførarane inviterte av KS (Kommunesektorens organisasjon). Det er mest på gøy, men det blir òg litt fagleg påfyll. Så eg har fått mamma (tidlegare ordførar Hilde Enstad) til å strikka VM-genser til meg til jul, humra ho.

Ordførarane skal besøkja VM-anlegget i Granåsen søndag 2. mars. I så fall er det 20 kilometer langrenn med fellesstart og skibyte med Therese Johaug co. dei skal sjå. Eventuelt også kombinert for kvinner.

På programmet elles står mellom anna møte i LVK (Landssamanslutninga av vasskraftkommunar).

– Og så vonar eg å få besøkja ein del einingar og helsa på folk, fortalde Thea Vaage, som tidlegare har vore ordførar i fem veker; to då Vegard Bjørnevik var ute i permisjon då sonen vart født i januar, og tre veker i samband med sommarferien.