Siste avis frå Stord

I august vart det kjent at trykkeriet på Stord skal leggjast ned. Avisa Sunnhordland sitt trykkeri, som den siste tida har bore namnet Polaris trykk, har eksistert i 120 år, men 31. desember er det slutt. Årsaka er forverra økonomisk situasjon og færre oppdrag. Dermed forsvinn 8,5 årsverk.

Grenda har blitt trykt på Stord sidan januar 2000. Før den tid hadde avisa eige trykkeri. Men i samband med at Hass-familien selde avisa, valde dei nye eigarane å setja ut trykkinga. Det gamle prenteverket hamna visst ein stad i Baltikum.

For Grenda er det unekteleg vemodig at det no blir slutt på samarbeidet med Morten Tislevoll og dei andre på trykkeriet og pakkeriet på Stord. Vi takkar så mykje for desse 25 åra, og ynskjer kvar einskild av dei tilsette lukke til vidare med andre gjeremål.

Neste Grenda vert prenta 23. desember og distribuert på sjølve julaftan. Den avisa skal prentast hjå Schibsted Trykk Bergen AS i Godvik. Dei prentar allereie mellom anna Hordaland Folkeblad. Vi kryssar fingrane for at overgangen går smertefritt.