Silje gir seg – Anton blir ny leiar

– Eg har valt å gå av som leiar fordi eg også står på stortingslista. Då synest eg det er lurt å fordela det til nye gode krefter, seier den avtroppande leiaren.

Ny leiar Anton Langeland er bonde i Gjetingsdalen, og har tidlegare mellom anna vore generalsekretær i Norsk Bonde- og Småbrukarlag.

– Eg er ganske stolt over å bli vald som leiar i Kvinnherad SV. Eg trur at den retninga som samfunnet tek no i mykje større grad enn før treng ein sosialistisk vinkling, seier Langeland.

Ut av Sp

Tidlegare var han medlem i Senterpartiet.

– Eg har bytta parti fordi at eg er ueinig med Senterpartiet. Når ein har følgt Sp over lang tid og ser kva retning dei eigentleg dreg samfunnet i saman med Ap, så ser eg at eg høyrer heime i SV, fortel Langeland.

– Vi er utruleg glad for at Anton har sagt seg villig til å vera leiar, og det er utruleg givande å vera leiar i SV. Vi har hatt medlemsvekst, og det er eg sikker på at kjem til å fortsetja, seier Nordtveit Olsen.

Tydeleg val

Om kva han ser for seg som leiar i SV, svarar Langeland at han vil ta opp tråden med medlemsvekst og at han har tru på at partiet kan få til gode ting.

– Slik som samfunnet utviklar seg no, der ein får større skilnader kvart år og ein prøvar å sparka fundamentet under den solidariske modellen, altså velferdsmodellen som Noreg eigentleg er tufta på, er det kjempeviktig at folk faktisk tek eit tydeleg val om korleis dei vil at samfunnet skal sjå ut, seier han og legg til;

– Venstresida i politikken og spesielt SV har eit stort potensiale for å få med seg fleire menneske, fordi vi har ein politikk for alle. Sjølvsagt skal vi fortsetja med medlemsutviklinga, og det trur eg vi har veldig gode føresetnadar for med det nye styret og ikkje minst Silje som skal snakka vår sak på Stortinget.