Sikta i Husnes-smuglinga funnen død
Laurdag vart ein varetektsfengsla mann funnen død på cella si. Mannen var ein av dei seks sikta i samband med kokainsmuglinga på Husnes.
Publisert
Sist oppdatert
Fædrelandsvennen skriv at ein innsett vart funnen død i Froland Fengsel laurdag morgon, då fangane vart vekka og låst ut for dagen. Bergens Tidende vidareformidlar opplysingar om at den avdøde var ein av dei seks som vart pågripne i samband med eit gigantisk kokainbeslag på Husnes i midten av april.
Ingen mistenkt
Annonse
I følgje Bergens Tidende er den avdøde ein italiensk mann i 40-åra som etterlet seg kone og to barn.
Rettssaka er førebels dagsett til 6. mai 2024 i Hordaland tingrett, men det er ikkje tatt ut tiltale.
– Saka er framleis under etterforsking, opplyser politiadvokat Jørgen Henriksen i Vest politidistrikt til Fædrelandsvennen.
Dødsfallet blir etterforska, men dødsårsaka er ikkje kjent. Fædrelandsvennen fekk søndag kveld opplyst at det ikkje er nokon som er sikta eller mistenkt for å ha gjort noko straffbart i samband med dødsfallet.
Annonse
Vestlandets største beslag
Det var natt 11. april at tollvesenet og politiet i lag slo til mot smuglarane, som hadde henta ut 150 kilo kokain. Narkotikaen vart smugla med lastebåten «Nordloire», som gjekk frå Brasil til Husnes med aluminiumsoksid som skulle til Hydro Husnes, utan at nokon frå mannskapet har vore mistenkt for å vera innblanda i smuglinga.
Fem menn og éi kvinne vart arresterte i samband med aksjonen på Langgåta. Beslaget av kokainet er det største som er gjort på Vestlandet, og stoffet hadde ei reinheitsgrad på 90 prosent, som politiet omtalar som veldig høgt.
