Sikta for å ha køyrd bil med falske skilt

Mannen er tiltalt for brot på straffelova paragraf 361 første ledd bokstav B, som seier at det er rettsstridig å bruka ettergjorde eller forfalska dokument som om det skulle vore ekte. Han er også tiltalt for brot på to punkt i vegtrafikklova paragraf 31; for å ha brukt bilen som ikkje hadde lovlege skiltar og for å ha vore i ei trafikkulukke som medførte materiell skade utan å seia ifrå til politiet.

Bilen skal ha vore avskilta grunna manglande omregistrering. Tiltalte skal ha køyrd bilen med falske skilt ved fleire høve, eine gongen frå Kvinnherad til Masfjorden og ved ein av turane skal han ha kollidert med eit gjerde i Kvinnherad. Gjerdet vart knekt og øydelagt, og tiltalte meldte verken ifrå til politi eller skadelidne.

Påtalemyndigheita meiner at straffeskuld i denne saka kan bevisast utover ein kvar rimeleg tvil og at saka bør avgjerast med eit førelegg på 23 000 kroner, eller 23 dagar i fengsel om tiltalte ikkje kan betala.