Signerte kontrakten på ny Husnes skule

Det var tendensar til høgtid då kommunedirektør Leif Ove Mikkelsen og dagleg leiar i Consto Bergen sette sine respektive namnetrekk på kontrakten som forpliktar begge partar til å få ein ny barneskule på plass på Husnes.

– Viktig for oss

Utbyggjaren uttrykte lette over at avtalen var i hamn.

– Det var eit sjeldan kjærkome prosjekt å vinna, fordi det er ganske tøft å vinna oppdrag i dag. Det er få jobbar å rekna på, og den private marknaden er i praksis død, slik kostnadsbiletet er for tida, forklarte dagleg leiar for Consto Bergen AS Arve Sande då han og Mikkelsen begge skreiv under avtalen.

Noko av kvardagen Sande skildrar skuldast at bustadmarknaden i realiteten er vekke.

– Det er dei offentlege prosjekta det er kamp om, dei er attraktive og viktige for bransjen vår. Denne kontrakten gjer at me kan halda på våre gode medarbeidarar og ikkje treng å seia opp våre eigne tilsette, la Sande til.

Det neste steget for Consto Bergen er å snakka med lokale underleverandørar for å knyta til seg lokal kapasitet.

– Me er interesserte i å nytta oss av lokale underleverandørar. Det krev sjølvsagt at den lokale røyrleggjaren og elektrikaren har kapasitet til oss. Nokre av faga er det vanskeleg å finna underleverandørar på lokalet, så nokon disiplinar må ser eg me må ut av Kvinnherad for å finna, konstaterte Sande.

Ferdig til 2026

Ordførar Vegard Bjørnevik var glad etter signeringa var unnagjort.

– Det er ikkje kvar einaste ordførar som får oppleva å byggja ein ny skule. Det er etterlengta og gledeleg å få til dette. Det er eit stort prosjekt for Kvinnherad, og eit viktig steg å ta for å få kvalitet i skulekvardagen vidare også, meinte Bjørnevik.

Kommunedirektør Leif Ove Mikkelsen vurderte i same bane som Bjørnevik.

– Dette er ein stor dag, det er ein stor kontrakt og skal bli eit etterlengta bygg. Eit heilt nytt bygg som er bygd for å vera skule, tilrettelagt for pedagogikk og praktiske løysingar. Det er veldig gledeleg å få på plass, supplerte Mikkelsen.

Skulen skal vera ferdigstilt til årsskiftet 2025/-26.

– Me skal ha teknisk prøvedrift i eitt år etter det, opplyste Rune Vonheim, leiar for prosjektutvikling i Consto Bergen.

Sektorleiar Heidi Særsten Solheim ynskjer skulen på plass så snart som råd.

– Me må ha ein god overgangsplan klar når skulen skal takast i bru. Me er i gang med å tilsetja ny rektor der, som blir sentral i prosessen med å planleggja overgangen til den nye skulen, men også å følgja framdrifta på bygginga av han, sa Solheim.

Ho hadde ei liknande rolle då ny Halsnøy skule vart bygd, og veit det meste om kva som ventar den nye rektoren som skal losa elevar og lærarar inn i den nye skulen.

Oppstart av arbeidet til 174,4 millionar er sett til 4. mars. På spørsmål om kven som skal ta første spadetaket, var spesielt éin kar kjapt framme.

– Eg har lyst til å køyra gravemaskin! sa Vegard Bjørnevik, og avklarte kjapt alle spørsmål om det temaet.