– SFO-prisane er svært høge

Når no politikarane skal sy saman endeleg budsjett for 2022, vert truleg SFO-prisane eit viktig tema.

I formannskapet torsdag kveld vart det berre sagt nokre få ord om kva dei einskild partia ynskjer å fokusera på i budsjettforhandlingane. På vegner av Ap trekte Synnøve Solbakken fram SFO-prisane.

– Vi opplever at dei er svært høge, sa ho.

Ap vil òg jobba for heiltidsstillingar.

– Dei som ynskjer å gå opp i heil stilling, må få anledning til det, meinte Solbakken.

Til slutt understreka ho at nye lokale for Hjelpemiddelsentralen er ei viktig sak for partiet.

På vegner av Høgre nemnde Leif Sverre Enes to punkt:

* Etterslep i vedlikehaldet på kommunale bygningar og vegar.

* Investeringar som kan gje framtidige inntekter.

Klima og miljø

Hege Lægreid Røssland presenterte tre punkt på vegner av SF:

* Redusera sosiale ulikskapar, mellom anna SFO

* Miljø og klima.

* Trafikktryggleik og gode kommunikasjonar.

Om prisane på SFO sa ho:

– Veldig mange nyttar ikkje SFO i dag, då det er for dyrt. Vi får heller ikkje småbarnsfamiliar til å flytta hit med dei prisane.

Kommunedirektør Ragnhild Bjerkvik lova at administrasjonen skal greia ut og rekna på konsekvensane av endra prisar for SFO.

Marit Årthun og KrF har nokre punkt på lista, dei òg:

* Eit måtehalde budsjett.

* Styrka frivilligsektoren.

* Klima og miljø.