Sette av to dagar til energispørsmål

Endre Olsen opna med «The times they are changing», ein låt om dei skiftande tidene, skrive for 60 år sidan av Bob Dylan. Det var eit svært passande låtval med tanke på at konferansen meir enn noko anna skal kikka framover.

Ordførar Hilde Enstad og næringslos Frode Hetlevik stod for den offisielle opninga, etter at Olsen bokstaveleg tala hadde sett tonen for konferansen.

– Kjære alle saman, hjarteleg velkomen. Kvinnherad er ein kraftkommune, eller ein vertskommune for kraftanlegg. Vasskraft er det store hos oss, med Statkraft som skal oppgradera i Mauranger og SKL med anlegg i kjømda for oppgradering. Kva blir framtida? Kva meir enn oppgraderinga ser me fram mot? spurde Enstad

Delingskultur

Enstad nemnde vind, og konkluderte med at det er motstand der. Solceller er nokon på private hustak, men kva elles?

– Jordvarme, kjernekraft, alt dette skal me blir klokare på i desse to dagane. Eg er imponert over Kvinnherad Næringsservice og Frode Hetlevik over kva dei har fått til he, sa ho rosande.

Hetlevik på si side gledde seg til å levera ein Kvinnheradkonferanse til dei frammøtte.

Arild Sondre Sekse var konferansier og ordstyrar på konferansen, og meinte Endre Olsen hadde levert ei draumeopning.

– Ein står i store endringar nasjonalt og internasjonalt. Partnarskap, samarbeid og delingskultur er vegen fram til å løysa utfordringane me står i, har eg lært. Me må løysa ting for dei nye generasjonane i saman, formante Sekse.