Sette av pengar for å utbetra vegen til Høylandsbygd

– Vi ynskjer å inngå eit samarbeid med både fylket og eventuelt privat kapital for å få utbetra dei mest kritiske punkta på vegen til Høylandsbygd, sa Per Harald Havnen Löfgren Johansen (Ap) då han presenterte hovudpunkta i budsjettet.

Kristoffer Tufta (H) fekk æra av å gå nærare inn på dette konkrete punktet. Han opplyste at det i økonomiplanen no er sett av 5 millionar kroner i 2026 frå kommunen si side.

– Stoda i dag er at det er veldig mykje tungtrafikk inn og ut av Høylandsbygd. Det er mange som jobbar der, det er mange som bur der, og meir blir det; Norwater er i ferd med å flytta produksjonen sin og Tronds Marine utvidar. Så det er veldig velkome, som ein høylandsbygdar og fornuftig som ein Høgre-mann ville sagt, å sjå på den tredelte løysinga, slik at også næringslivet får vera med og få litt fart i utbygginga, analyserte han.

Raskt og effektivt

I sjølve vedtaket står det at prosjektet skal gjennomførast ved ei tredeling av kostnadene mellom kommunen, fylket og næringslivet. «Prosjektet er avgjerande for å støtta opp om den viktige næringsaktiviteten i Høylandsbygd, og leggja til rette for vidare utvikling i området. Kommunestyret ynskjer ikkje eit tradisjonelt reguleringsplanarbeid, men heller ei punkt- og siktutbetring av vegen, for å sikra ei rask og kostnadseffektiv gjennomføring», heiter det.

Kommunedirektøren får i oppgåve å prosjektera utbetringa og bruke 2025 til å få alt klart for å gjennomføra ein konkurranse om prosjektet. Konkurransen skal vera klar til å starta tidleg i 2026.