Sette av midlar til fleire vegprosjekt

Førre tysdag hadde Hovudutval for samferdsle og mobilitet møte. Ei av sakene då heitte «Fordeling av planleggingsmidlar fylkesveg i Vestland 2025». Med atterhald om fylkestinget si godkjenning av budsjettet for 2025, vart det løyvd vel 70 millionar kroner til planlegging av ulike prosjekt.

29,9 millionar vert sett av til pågåande planar. Blant desse får reguleringsplanar i Kvinnheradpakken 1,9 millionar kroner.

Halsnøy, Sandvoll og Porsvik

«Planarbeid knytt til prosjekta Fv.500 Sæbøvik – Eidsvik - Tofte og Fv.548 Sandvoll bru som er ein del av Kvinnheradpakken. Det blir arbeida med mindre endringar som skal behandlast av kommunen i 2025. Prosjektet Fv. 500/548 Opsanger - Porsvik skal leggja betre til rette for mjuke trafikantar og auke trafikktryggleiken. Mellom Opsanger og Porsvik manglar det tilbod for gåande og syklande. Fylkesvegen har òg vekslande vegstandard og enkle delstrekningar har svært dårleg standard», vert det opplyst i saksutgreiinga.

Det overordna målet med prosjektet er å knyta saman Husnes, Sande og Valen, samt betra vegstandarden for gjennomgangstrafikk.

«Avsett ramme er truleg ikkje tilstrekkeleg til å utbetra heile strekninga til fullgod standard. Utbygging vert tilpassa ramma. Planarbeidet er i gang, og det er lagt opp til å levera planforslag til 1. gangsbehandling i andre halvdel av 2025. Forventa 2. gangsbehandling og vedtak i andre halvdel av 2006 avhengig av kva merknader ein får», skriv fylket.

Pollane

Fv. 49 Nordrepollen - Austrepollen frå 3,5 millionar i planleggingsmidlar. Grunna rasfaren har fylket starta arbeidet med ny reguleringsplan.

«Ein byggjer vidare på eit forprosjekt der ein tilrår å leggja vegen i tunnel, og skal i samband med planarbeidet gjennomføra ei konsekvensutgreiing av dei ulike alternativa. Planarbeidet er i gang, og det er lagt opp til å levera planforslag til 1. gangsbehandling i fyrste halvdel av 2025. Forventa 2. gangsbehandling og vedtak fyrste/andre halvdel av 2026 avhengig av kva merknader ein får og når det vert utført arkeologiske registreringar», vert det opplyst.

Ranavik

Sekkeposten «Andre pågåande planar» får totalt 275.000 kroner. Her finn ein også Ranavik ferjekai.

«Etter ombygging og oppgradering av Ranavik ferjekai er det ikkje lenger mogeleg for snøggbåt å leggja til tilleggskaien. Det er bygd ein midlertidig snøggbåtkai som må erstattast av ny permanent kai. Dagens kaiområde har for lite areal til oppstillingsplass for bilar og parkering. Det er dårleg tilrettelagt for mjuke trafikantar og kollektivtrafikk. Det er ikkje tilrettelagt eigne oppstillingsfelt for spesialtransport/farleg gods og rørslehemma. Det er venta at behovet for parkering vil auka i framtida. Planarbeidet er starta opp, det er for tidleg å seia noko om framdrift», står det i sakspapira.

Mundheim - Holdhus

I kategorien «pågåande forprosjekt» finn ein 500.000 kroner til Fv. 48 Mundheim – Holdhus.

«Det er behov for breiddeutviding, møteplassar, utbetring av kurvatur og sikt. Tre bruer er registrert med skadegrad «stor». Statens vegvesen har tidlegare gjennomført forprosjekt for strekninga, og dette legg opp til omfattande og kostbare utbetringar. Det er behov for å sjå på enklare tiltak som i større grad følgjer dagens vegtrasé, og som dermed kan danna grunnlag for dei andre strekningsvise utgreiingane som skal gjennomførast. Forprosjektet er starta opp, og vil gå gjennom 2025», vert det opplyst.

Ferja til Stord

I «Nye forprosjekt» står mellom anna ferjestrekninga Stord - Kvinnherad, som får 700.000 kroner til planlegging. Det er starta eit forprosjekt for innkorting av sambandet, og ei mogleg løysing er Djupavika. Det blir også sett på mogleg nytt ferjestø på Halsnøy. Forprosjektet starta opp hausten 2024, og er venta ferdig i løpet av 2025.