Sesongstart for langrenn

På sundag startar rennsesongen for langrennsløparane. I år har dei trent på snø mykje lenger enn tidlegare år.

Torsdag var skigruppa til Uskedalen IL i full sving i Fjellhaugen for førebu seg til årets første renn. På sundag er det første sprett i skikarusellen, med klassisk renn i løypene

 

Gode løyper

– Det var gode løyper tidleg denne sesongen, så dette ser lyst ut for i år, seier Kari Bråtun.

Ho er trenar for dei åtte- og niårige yngste langrennsløparane i Uskedalen IL, i tillegg til å vera aktiv skiløpar sjølv.

Torsdag dirigerte ho seks ungfolar rundt på snøen, både gjennom leikar som stiv heks og haien kjem, og ho ruta dei gjennom det som liknar meir på typisk langrennstrening.

– Me har trent inne ein gong i veka på hausten og vinteren saman med dei eldre løparane, men det er kjekkast å koma oss ut på snø, meiner Anna Simone Enes og Frøy Sæle.

 

Full guff

Oppe i startområdet var firkløveret Torbjørn Haugland, Pål Ingemar Haugland, Amund Hella Berge-Soldal og Karsten Huse Bjørnebøle samla for å få ta seg ut. Trenar Stig Berge-Soldal ville ha gutane gjennom 2- og 3-kilomtersløypene, og det så raskt dei klarte.

– No skal de ta dykk ut, og gå på desse kilometrane så fort som råd. Slik får de testa dykk litt før første rennet, argumenterte Berge-Soldal før gutane i alderen ti til tretten skøyta seg ut frå startstreken.

Eit lite kvarter etterpå låg det fire karar og heiv etter pusten i målområdet, til skryt frå trenarane.

– No tar me oss ein roleg tur og får ut slagget, formante Berge-Soldal, til motvillig aksept frå kvartetten.

Steinar Haugland, ei av dei mange trenarkreftene i UIL, lovprisa forholda i Fjellhaugen denne vinteren. Torsdag var det godt med snø og skarpt føre. Det var mellom anna synleg ved at langrennsløpar Henrik Bauge suste forbi i eit tempo me mistenkjer at Petter Nordtug jr. hadde slite med å halda med dagens form.

– Ein tidleg start på treningane her i Fjellhaugen gir oss sjansen til å trena mykje lenger. Dei åra me får sein snø, hamnar me i ein annan klasse enn til dømes Voss og Røldal, som får snø mykje tidlegare. Førre sesong var uansett spesiell. Då hadde ikkje ein gong Voss snø før etter nyttår, påpeikar Haugland.

Uansett utfall i tevlingar seinare i vinter, er Haugland sikker på ei sak:

– Dette er positiv skiglede som barna tar med seg til vaksen alder, sluttar Haugland.