Serverte ein forrykande russerevy
Premieren på årets russerevy «Size Do(esn’t) Matter» fekk verkeleg fram latteren hos publikum. Det treng me i ei tid prega av mykje alvor.
Publisert
Sist oppdatert
Fredag kveld var det premiere på «Size Do(esn’t) Matter» revyen i Kulturhuset Husnes, og den fullsette kinosalen fekk ein time med variert underhaldning frå modige ungdommar.
Det er mildt sagt imponerande av årets russekull å snikra saman ein slik russerevy på berre nokre få veker. Den velskrivne revyen var både innom lokale og nasjonale tema, som mellom anna koronapandemien, «Kvardagsprat i Kvinnherad», parodiar av lærarar og morosame filmsnuttar. Alt ispedd massevis av ironi og humor, song og musikk og ikkje minst ein stor dose ungdomleg sprell.
Annonse
Latterbrøl i salen
Som følgje av koronarestriksjonane var det maksimalt 200 publikum i salen, men det la ikkje noko dempar på stemninga. Fleire av innslaga fekk fram latterbrøl frå dei frammøtte, spesielt då dei fekk eit innblikk i korleis det går føre seg under lunsjpausen til lærarane. Her parodierte mellom anna Isak Naterstad læraren Elise Sundal, som i kvart høve snakkar om det nybygde huset sitt i Dimmelsvik. Ungdommane imponerte med god humor, overdriving og godt skodespel.
Russegutane serverte fleire gode klassiske humorinnslag, som til dømes songnummeret «Forelska i læraren». Med roser i munnen via dei låta til læraren Nadia. Og i dette innslaget fekk dei verkeleg vist at det finst fleire store talent blant Kvinnherad-ungdommen. Brynjar Vigrestad imponerte nemleg med gitarsolo og ei flott songstemme.
Kasta på dør
Annonse
«Presidenten befaler», inspirert av TV-programmet «Kongen befaler» fungerte også veldig godt. Russepresident Håvard Bruvik og visepresident Emilie Askeland var programleiarar, medan Isak Naterstad, Emma Miranda Heggøy, Brynjar Vigrestad og Regina Palsdottir måtte bryna seg på nokre morosame og nesten umoglege oppgåver. Første runde med «Presidenten befaler» var ein filmsnutt der dei fire elevane konkurrerte om å bli først kasta ut frå biblioteket. Her var det mange morosame og varierte løysingar. El-gitar, blender, høg musikk og støvsugar var noko av det dei nytta for å til slutt bli kasta på dør.
I runde to av «Presidenten befaler» skulle elevane konkurrera om kven som greidde å eta mest gelé med berre ei hand. Lett tenkjer du, men ei skei vart byta ut med både q-tips, dildo, sag og hammar. Dette innslaget skapte både latter og jubel hjå publikum.
Ein kan ikkje anna enn å ta av seg hatten for desse flinke ungdommane. På rekordtid klarte dei å sy saman ein variert og morosam revy, og ut ifrå publikum å dømma var det ein forrykande russerevy.
