Ser fram til nye utfordringar i TV 2

TV 2-reporter Karen Anna Kleppe har sidan januar førre året stått heilt på eigne bein på kanalen sitt Tromsø-kontor. No flyttar ho tilbake til Bergen.

– Eg visste frå byrjinga av at eg skulle tilbake, men det vart litt tidlegare enn venta. Det har vore eit fantastisk eventyr eg ikkje ville vore forutan, og eg føler meg privilegert og heldig som har fått lov å dekka denne regionen. Det er ein stor landsdel å få ansvar for, og då var det sjølvsagt kult at TV 2 valte å satsa på meg, fortel Kleppe til Grenda.

No skal Sandvoll-jenta tilbake til TV 2 i Bergen, og ser fram i mot spennande tider for kanalen.

– TV 2 er i utvikling, og TV2.no blir viktigare og viktigare for satsinga. Det er mykje spennande som skjer framover, fastslår ho og legg til at ho gler seg til å flytta tilbake, spesielt då ho har ein kjærast som ventar i regnbyen.

– Eg føler meg heldig

Kleppe overtok jobben, med base i Tromsø, etter Egil Pettersen for eit års tid sidan. Ho har vore åleine som reporter, med heldigvis har ho hatt ein fotograf med på laget.

– Eg har verkeleg fått utfordra meg sjølv, spesielt rundt det å driva eit kontor åleine. Kvardagen har me kunna lagt opp sjølv, men det er me så må henta fram sakene og knyta kontakt med folka. Det er veldig mykje jobb ein ikkje ser før ein står med ansvaret og ikkje har eit stort kontorfellesskap å lena seg på, men likevel er det Norges kulaste stilling, fortel ho.

Ein endeleg dato for den interne overgangen er endå ikkje sett, så Kleppe ser fram i mot å nyte den siste tida i nord.

– Det er eit fylke fylt med flotte folk, kultur, politikk og natur. Eg føler meg heldig som har fått reist over heile Tromsø og Finnmark, og eg sit igjen med mange flotte opplevingar. Eg har jo vore åleine som reporter i norges største fylke, så eg har jo følt at eg ikkje har fått laga dei sakene eg har ønskja, men slike tankar har eg berre måtta godtatt, seier ho.

Kleppe meiner det er spesielt ein ting Kvinnherad og nord har til felles, og dette har ho nytta seg godt av.

– Likt som heime i Kvinnherad er det ein fantastisk natur her. Fjella har eg nytta godt, anten med fjellski eller til fots.

Har du eit høgdepunkt å trekkja fram?

– Eg har fått opplevd så mykje at det er vanskeleg å trekkja fram berre eit. Men eg har hatt det aller kjekkast når eg har teke oppdrag ute i bygdene i Troms og Finnmark. Dette er plassar eg aldri hadde fått moglegheit til å besøkja elles. Det er eit klisje svar som journalist, men det er så kule folk og gode saker her. Og det har jo sjølvsagt vore stas å vore med på dei store tinga, som mellom anna å intervjua utanriksministeren i Russland, fortel ho.

TV 2 styrkar nettsida med 30 nye stillingar

Same dag som Grenda tok ein prat med TV 2-reporter Karen Anna Kleppe, presenterte TV 2s sjefredaktør Olav T. Sandnes og sjef for TV2.no, Derek Bjøgerud, ei ny satsing for dei kommande åra.

TV 2 skal styrka desken og etablerer i tillegg ein helt ny breaking-desk. Dei jaktar no spesialistar på «breaking news».

TV 2 styrker TV2.no med heile 30 nye stillingar, og søkjer dermed dyktige journalistar og digitale hovud. I første omgang lyser dei ut stillingar som skal arbeida med breaking news, direktesendingar, videodesken, sosiale media, samt underhaldning- og kjendisnyhende, står det å lesa på M24 si nettside.

Stillingane blir lyst ut om kort tid, og ein av dei første stillingane som vart lyst ut er TV 2 sin nye breaking-sjef.