Sentrale vitneforklaringar i rettssalen torsdag

Torsdag var det i tingretten mellom anna sett av tid til vitnemål frå tre personar som på ulikt vis var vitne til det som skjedde på like før og samtidig som Renate Strand Normann vart slått til døde.

Aktor viste telefonlogg som dokumenterte at Normann var i telefonen med den første av vitna frå klokka 19.37 og i 17 minutt frametter. Vitnet, ein mann i 40-åra busett i Kvinnherad, fortalde om sitt forhold og kjennskap til Normann.

– Eg plukka ho opp på Husnes etter jobb, og tok ho med til Uskedalen. Der sette eg ho på bussen i 16-17-tida, forklarte vitnet.

Normann sender vitnet ein snap av at tiltalte er på bussen ho tar til Årsnes. På kvelden ringer ho vitnet kl. 19.37.

– Ho er fortvila og redd. Hunden hennar hadde vore borti ein katt. Ho fortel ho er kasta eller skubba utanfor ein kant. Ho meiner hunden er inne hos han [tiltalte]. Ho grin i telefonen, spør om me kan koma over og hjelpa ho. Eg prøver å snakka ho bort frå situasjonen. Ho seier noko sånt som «Skal du slå meg med den no?», eg hugsar ikkje alt ordrett. Eg blir sett på vent for at ho skal ringa ein annan som bur på øya, forklarte han frå vitneboksen.

Seinare på natta forklarte han seg for politiet.

– Under samtalen du har klokka 19.37, veit du då kor ho er?

– Eg har sett ho på snapkartet, og ho har sendt snap-ar under vegs, så eg visste kor ho var, stadfesta vitnet.

Forsvararen til tiltalte peika på at avdøde hadde høg konsentrasjon av amfetamin i blodet hos ho.

– Fekk du inntrykk av at ho var rusa då trefte ho?

– Det sveiv meg ikkje at ho skulle ha vore rusa då eg snakka med ho, så eg trur ikkje ho hadde tatt noko då eg var med ho, svarte vitnet.

Ringer annan venn

Samtalen det første vitnet hadde med Normann vart sett på vent for at Normann skulle ringa nokon som var på øya. Personen ho ringte, ein mann i 50-åra busett i Kvinnherad, vitna via videolink.

Telefonloggen viste at samtalen mellom dei starta klokka 19.49. Aktor bad han forklara kva korleis samtale var.

– Kva seier Renate?

– Det er snakk om vald og det er kaos. «Skal du slå meg i hel med den slegga?» seier Renate til nokon der, refererte vitnet via videolinja.

Så blir linja broten, og vitnet ringer til ein han kjenner på Varaldsøy. Han er ein del av brannmannskapet på øya, og kjem til åstaden kort tid etter, som den tredje i rekka etter at Normann var slått.

Aktoratet spelte også av eit lydopptak av ein telefonsamtale som fann stad mellom vitnet og brannmannen seinare på kvelden. Der blir vitnet fortalt at venninna er død. Også dette vitnet forklarte seg for politiet seinare på natta Normann døde.

Videovitne

Det siste vitnet som gav si forklaring var ei kvinne i 80-åra som er busett på Varaldsøy. Hennar forklaring er filma, og vart avspelt for retten avslutningsvis på andre dag i rettssalen. Hennar forklaring vart filma som ein rekonstruksjon av hennar bevegelsar og observasjonar, og retten fekk eit endå tydelegare innblikk i åstaden.

Kvinna fortalte korleis ho såg den tiltalte slå Normann med noko ho meiner såg ut som ein stokk. Ho sa ho høyrte eit skrik og såg avdøde falla til bakken. Ho sa vidare at tiltalte slo nokre gonger også etter at Normann hadde ramla på bakken.

– Eg tenkte eg måtte bort til dei. For meg såg det ut som ho var bevisstlaus der ho låg, sa kvinna i videoen.

Rettssaka held fram med nye vitneforklaringar fredag.