Senterleiinga snur om parkeringsavgift

Tidlegare i sommar annonserte senterleiinga ved Husnes storsenter at dei skulle innføra parkeringsavgift ved senteret, og at det skulle kosta pengar frå fyrste stund etter stengetid. No snur leiinga.

I ein mail i midten av august skreiv eigedomssjef i Midgardgruppen Anders Garmel at «vi innfører no eit parkeringssystem slik at vi sikrar parkering til kundar og besøkande på Husnes Storsenter. Vår erfaring er at kundar til senteret kjem til fulle parkeringsplassar som følgje av at parkeringsareala blir nytta av framandparkering (t.d. arbeidstakarar elles på Husnes)».

Den opphavelege planen var at det skulle vere gratis parkering dei to fyrste timane, før ein måtte betala 16 kr timen. Etter senteret sine opningstider skulle det koste frå fyrste stund. Etter fleire reaksjonar både på Facebook og i avisene har leiinga no snudd, og seier at etter klokka 16 skal det vere gratis parkering på senteret sine parkeringsplassar.