– Senk farten og ta omsyn

I ei undersøking gjennomført av Ipsos for Gjensidige seier 45 prosent av alle som eig og disponerer båt i Hordaland at dei har opplevd sjenanse på sjøen.

– Høg fart, uvettig køyring og liten kunnskap om å føra båt er noko av det som irriterer mest, seier Arne Voll, kommunikasjonssjef i Gjensidige, i ei pressemelding.

I denne peikar dei på at det kan bli ein ny rekordsommar ved sjøen, mellom anna på grunn av at prisane på utanlandsreiser er auka, frykt for streik og krigen i Ukraina. Med stor aktivitet ved sjøen, aukar samstundes faren for at det skjer ulukker.

Naudsynt med kompetanse

I fjor drukna 75 personar, der fleire av ulykkene skuldast høg fart og promille med fritidsbåt.

– Me ønskjer at flest mogleg skal skaffe seg kompetanse før dei set seg i ein båt. Me ser heilt klare tendensar til at motorstorleik og fart har auka dei siste åra, seier Voll.

Så langt i 2022 har Gjensidige motteke skademeldingar på nær 200 fritidsbåtar i Vestland, med utbetaling på 10 millionar kroner. I pressemeldinga oppmodar difor Voll båtførarar til å senke farten og ta omsyn.

– Då blir det tryggare og kjekkare for alle som oppheld seg på sjøen, sluttar Voll.

I kvar av kommunane Austrheim, Eidfjord, Fjaler, Gloppen, Solund, Stryn, Vaksdal, Vik og Årdal er det meldt om ein skade frå båteigarar til no i år.