Seniordag med eit høgaktuelt tema: Velferdsteknologi

Seniordagen finn stad i Kulturhuset Husnes onsdag 10. november.

Initiativtakarane er e-helsekoordinator Marte Kristoffersen Øyjord og Caroline Holmedal Saghaug, begge er tilsett i Kvinnherad kommune. Caroline høyrer til under kommunen si avdeling for aktivitet, læring og meistring og arbeidar med førebyggjande heimebesøk.

– Formålet er å gi seniorane og pårørande eit innblikk i kva kommunen har å tilby, kva utstyr ein kan kjøpa sjølv, og korleis du går fram for å finna informasjon om dei ulike tilboda. Det vil vera presentasjon av dagens velferdsteknologitilbod, mellom anna elektronisk medisindispenser og tryggleiksalarm, fortel Caroline.

Tryggare kvardag

Kommunen sine tenester og lokale butikkar vil ha sin eigen stand, der ein kan få eit innblikk i kva dei har å tilby innanfor viktige hjelpemidlar. Fokuset vil vera på kva seniorane kan investera i sjølv for å få ein tryggare og enklare kvardag.

– Ulike tenester og lokale butikkar kjem til å visa fram sitt utval, slik at seniorane og pårørande kan orientere seg om kva som finst, fastslår Marte og held fram:

– Målgruppa er 65+, men denne dagen er like viktig for pårørande. Dei er ofte pådrivarar, og mogleg kjenner dei teknologien litt betre. Kanskje ser dei behova meir også.

Velferdsteknologi kan bidra til at folk kan bu heima lenger, klara seg sjølv og meistra eige liv. Det kan og fungere som støtte til pårørande og elles bidra til å forbetra tilgjengelegheit, ressursutnytting og kvalitet på tenestetilbodet.

– Me ønsker å arrangere ein slik dag for å gjera alle aspektar ved velferdsteknologi og hjelpemidlar kjent, samstundes ønsker me å ufarleggjera teknologien som er på marknaden. Det er jo eit hav av tilbod, og det kan ofte vera vanskeleg å navigera kva som finst i kommunen, informera Caroline og held fram:

– Mange teknologiske gjenstandar kan vera godt å ha installert før ein verkeleg treng det. Om ein kjøpar det privat, får ein ofte moglegheit til å ta dei i bruk på eit tidlegare tidspunkt, og får lært seg med produkta til ein treng det. Slik kan ein best mogleg vera i stand til å meistra det som ventar når ein vert eldre.

Nyttige einingar

I tillegg til spennande og viktig informasjon om ulike hjelpemidlar, vil dei presentera ulike einingar i kommunen som vil vera til nytta for målgruppa.

– Me vil og komma med informasjon om ulike einingar som er å finna i kommunen. Mellom anna vil Frivilligsentralen, Ergo- og fysioterapi og Brann og redning delta, fortel Caroline.

Seniordagen byr også på sosialt samvær.

– Det heile vil byrja med eit kulturelt innslag, og det vil vera eit kjekt og sosialt arrangement. Det er også ein ypparlig moglegheit for å kjøpa julegåve til nokon du er glad i, smiler Marte.

Naturlig nok er det først og fremst dei godt vaksne som er målgruppa for arrangementet.

– Men alle er hjarteleg velkomne, smiler Caroline.

– Me er spente, og gler oss veldig til denne dagen. Om du likevel er på Husnes, kom innom oss, me kan garantere at du blir litt klokare, sluttar Marte.