Sendte Fjelbergsambandet ut på høyring
Fjelbergsambandet er no kome endå eitt steg nærare realisering. Tysdag vedtok PTM-utvalet å senda reguleringsplanen ut på høyring.
Publisert
Tysdag fekk PTM-utvalet opp sak om «Ny 1. gangs behandling detaljregulering for delar av gnr. 208, 209, 210, 216, 217 og 224 – Fjelbergsambandet». Innstillinga frå kommunedirektøren var å senda planen ut på høyring og offentleg ettersyn, med seks vekers uttalefrist. Råka partar og instansar skal varslast.
«Administrasjonen får fullmakt til å gjera tekniske og visuelle endringar i plankart, føresegner og planskildring før utlegging. Endringane skal ikkje endra innhaldet i planen», stod det i sakspapira.
Annonse
– Det er spennande lesnad og sjå korleis dei vil løysa det som vi har høyrt snakk om i tiår, kommenterte Stein Olav Ølvestveit (Sp).
Han hadde elles merka seg at prosjektet vil føra til eit overskot av steinmassar.
– Kunne dei vore nytta til noko, til dømes næringsareal? Det er ein ressurs, som kanskje kunne vore brukt til å gagna øysamfunnet i staden for å bli gøymt i utmarka, spurde han.
Sakshandsamar Rune Helland svarte.
Annonse
– Vi ville svært gjerne gjort som du seier, men det har ikkje vore mogleg å få det inn i planen.
Utsiktsplass
Men sjølv om massehandteringa ikkje får plass i planen, så er det likevel meininga å bruka litt stein til å laga ein utsiktsplass.
– Ein annan ting vi har tenkt på, er Sydnes ferjekai. Når brua kjem skal ikkje det vera ferjekai lenger, berre beredskapskai. Vi har tenkt at den kanskje kan utviklast til næringsareal over tid, sa Helland.
Både Ølvestveit og resten av utvalet var nøgd med svaret, og følgde innstillinga samrøystes. Glad var nok også dagleg leiar Odd Ivar Øvregård i Fjelbergsambandet AS. Den tidlegare rådmannen følgde møtet frå tilskodarplass.
Føremålet med reguleringsplanen er å gje Fjelbergøy og Borgundøy fastlandssamband med Halsnøy. Tiltaket skal finansierast gjennom ferjeavløysingsmidlar.
Annonse
«Det inneber at ferje til både Halsnøy (Sydnes) og Utbjoa vil verte innstilt når bruene takast i bruk. Ferjeavløysingsmidlar kan kun søkast til prosjekt der det er vedteke reguleringsplan. Planen inneber òg ei oppgradering av vegsamband internt på Fjelbergøy og Borgundøy», heiter det i sakspapira.
