Selde ut frå Hauge skule
Laurdag arrangerte Høylandsbygd bygdalag loppemarknad på skulen i Høylandsbygd. Dagen før vart skulen lagt ut for sal.
Publisert
Sist oppdatert
I 2022 var det vedteke at fira skuler skulle seljast på den opne marknaden dersom bygdelag eller organisasjonar ikkje ville ta over. I Høylandsbygd takka bygdalaget nei, og skulen er no lagt ut for sal.
Laurdag arrangerte Høylandsbygd bygdalag loppemarknad i skulen for å sela unna nokre ting innan den tid. Her kunne ein få seg gamle skulekart og plansjar, instrument, servise, bøker og alt anna som har vore lagra på skulen over tid.
Annonse
Ein kunne tusla rundt på heile skulen og alt var merka med raude merkelappar med pris på, til og med hyllene på veggen, lampar, pultar og ein gamal gymbukk var til sals.
Forventa ein del
Når dørene opna var det kø utanfor skulen, nett som om ein skulle vore i storbyen. Folk gledde seg til å sjå kva godbitar ein kunne få tak i på innsida.
– Vi forventa jo litt folk, det var om lag 110 stykke som hadde trykka at dei skulle kome inne på Facebook. Det var ein grei måte å sjekka interessen på medan vi fekk marknadsført loppemarknaden, fortel styremedlem i bygdalaget Kristoffer Tufta.
Annonse
Om lag klokka 11.00 kunne Tufta fortelja at det vart gjort 72 sal på ein time, ikkje inkludert alle som hadde Vippsa.
– Til no har vi fått inn 12 000 kr, og då har eg ikkje oversikt over Vippsen, sa han.
Loppemarknaden hadde ope til 16, og frå klokka 15 køyrde dei super-sal med 50% på alt.
– Det som er igjen etterpå blir opp til kommunen å forvalta. Skulen er jo lagt ut for sal, så kanskje det som kjøper bygget får det på kjøpet, sa Tufta.
