Selde aksjar i Eqva for 76 mill.

I ei børsmelding førre onsdag opplyste skipsteknologiselskapet Eqva ASA at dei var blitt informerte om at Rune Skarveland og Trond Narve Skarveland frå Sandvoll sine investeringsselskap Eikestø AS, Eikestø Eiendom AS, Fureneset Eiendom AS and Fureneset Invest AS hadde inngått avtale med Nordic Corporate Bank om å overføra alle deira aksjar i Eqva til banken.

Det dreiar seg om i alt 15,9 millionar aksjar, som utgjer 21,2% av eigarskapen i Eqva. Avtalt pris var 4,80 kroner per aksje. Det utgjer ein total på 76,4 millionar kroner. I børsmeldinga kjem det fram at aksjesalet skuldast eit krav om å realisera verdiar etter betydelege tap på eigedomsmarknaden. Skarveland-brørne har mellom anna satsa stort kring Flesland.

– Vi er stolte over utviklinga som har vore i Eqva, Selskapet har vist solid framgang dei siste åra, og vi skulle ha likt å fortsetja som eigarar, er Rune Skarveland, styreleiar i Eqva, sitert på i børsmeldinga.

Eqva forstår det slik at Nordic Corporate Bank vil be om styreplass i Eqva, og at dei vil opptre som ein ansvarleg eigar. Rune Skarveland og Trond Narve Skarveland vil halda fram som høvesvis styreleiar og styremedlem inntil vidare.

Store underskot

I ei anna børsmelding kjem det fram at aksjane i Eqva var stilt som sikkerheit for to misleghaldne lån.

– Vi sel for å gjera opp gjeld. Vi tapte stort på eigedom, og er blitt einige med banken om å gjera det på denne måten, seier Rune Skarveland til Dagens Næringsliv.

Ifølgje avisa hadde Eikestø as, som er eigd av Rune Skarveland, eit underskot på nesten 70 millionar kroner i 2022. Fureneset Invest, som er eigd av Trond Skarveland, noterte eit tilsvarande underskot.

Gjennom dotterselskapet Nordic Industrial Solutions er Eqva eineeigar av BKS-gruppa på Sunde. Nyleg kjøpte dei også Kvinnherad Elektro i Rosendal og Vassnes Solutions.