Sel ut delar av familiebedrifta

– Me har brukt tid på dette, og kunne kanskje fått litt meir for aksjane hos andre, men det viktigaste for oss har vore å finna nokon som vil vidareføra Adonis. Dette er framtidsretta for oss, seier Per Ove Kviteberg om at han og familien no sel seg ned til 25 prosent eigarskap i

– Kjekt og vemodig

Familien Kviteberg har via eigarskap i ulike selskap hatt aksjemajoriteten i Adonis sidan oppstarten i 1988. No skalerer familien eigarskapen ned frå vel 50 til 25 prosent.

– Etter 36 år har me gitt frå oss kontrollen over bedrifta, seier Per Ove.

– Korleis er det?

– Det er alltid litt begge deler, meiner Bente.

– Det er veldig kjekt, og det er litt vemodig, legg ho til.

Familiebedrifta involverer ekteparet Bente og Per Ove og barna Camilla, Sigrid, Martin og yngstedottera Bertine, som alle er tilsette i Adonis.

– Prosessen har gått over lengre tid. Det var mykje meir skummelt i starten, då me bestemte oss for å gjera dette, enn då me nærma oss slutten. Me har lært dei nye eigarane å kjenna, og dei er veldig på linje med oss om kva me ynskjer på vegen vidare, seier sistnemnde om resultatet av avtalen.

Det er eit amerikansk eigarfond som kjøper seg inn.

– Dei kjøper familieselskap der gründerane ynskjer å trekka seg litt tilbake, men dei prøver så langt som mogeleg å halda på familiekonseptet, fordi innanfor shipping og programmering er det høgt verdsett at drivarane er tett med i drifta. Dei likar kontinuiteten og kulturen som ofte ligg i familiebedrifter, utdjupar Bente og Per Ove.

– Oppkjøparane er familiebedrift også. Dei er veldig på bølgelengde med oss, og har mykje dei same visjonane for utviklinga som oss, supplerer Bertine.

– Dei kjøper seg opp for at de skal halda fram med å driva Adonis vidare?

– Ja, med det unnatak av at me har ein spesiell konstellasjon med fire barn som alle jobbar i leiande posisjonar i selskapet. Camilla, som har vore dagleg leiar sidan 2013, ser ikkje for seg å vera leiar for sine søsken når familien ikkje lenger har eigarmajoriteten i selskapet. Me får no ein dagleg leiar som skal styra Adonis AS frå Washington, forklarer Per Ove Kviteberg.

90 tilsette

Då Adonis starta opp i 1988 var ideen å starta opp produksjon av dataprogram til pc-ar. Ballen byrja for alvor å rulla då eit reiarlag i Oslo trengte eit program for avlønning av hyre til sjømenn. Det gav eit visst innpass i reiarbransjen, og dei fekk kundar både lokalt og nasjonalt.

– Etter nokre få år bestemte me oss for å satsa utelukkande på shipping og maritim industri. Arne Gjerde sin input i selskapet dei 10-12 første åra var av vital betydning for at programvara vår fekk den grunnleggjande strukturen han har hatt i alle år. Me er han ei stor takk skuldig. Og så har me Alf Inge Lindtner som har vore med i Adonis i 30 år no, og styrer skyløysinga vår, rosar ein takksam Per Ove.

Det er no tre selskap som blir samla under Ripple Operations-paraplyen, med bedrifter i Vancouver i Canada, Houma nær New Orleans ved Mexicogolfen og i Sjøvangen på Halsnøy .

– No får ein inn gode ressursar på felt me kanskje har vore litt tynne på, som personvern og datatryggleik. Og no kan me spela på kvarandre sine ressursar, i staden for at alle tre skal ha desse alt fullt ut sjølv. Me har drive med skybaserte tenester i snart 20 år, og me vil tilføra Ripple kompetanse den vegen. Kjekt å få nye kollegaer er det også, seier Bente og Per Ove.

Drøymer stort

Adonis har tilsette andre plassar i Norge enn berre i Sjøvangen, men også i Ukraina og Filipinane. Dei er nær 90 tilsette, enten direkte eller indirekte. 17 av dei i Norge, kor 8 soknar til Sjøvangen-kontoret.

– Me har vore veldig uroa for ukrainarane våre i desse 2,5 åra krigen har pågått, seier Bente, Bertine og Per Ove nærast i kor.

Dei hadde majoritet fram til no. Alle dei andre med aksjar har selt seg ut, med unnatak av utviklingssjefen, som sit att med fem prosent, og familien Kviteberg, som beheld 25 prosent.

– Me føler at dette er rett veg å gå for oss, heller enn å driva som sjølvstendig selskap, seier dei, og vedgår at dei følte eit visst trykk frå både eksisterande kundar og potensielle kundar til å bli del av eit meir robust fellesskap.

– Det er for vår eigen visjon. Me som er her drøymer stort, og Adonis har eit godt rykte i marknaden, men det er tungt å koma framover heilt på eigenhand. Så me var avhengige av å ha nokon i ryggen for å støtta visjonen og for å nå måla me ynskjer å no, seier 26 år gamle Bertine Kviteberg, har jobba i fire år i bedrifta, om ein ser vekk frå det faktum at ho har vaska og hatt deltidsjobb i Adonis frå ho var tenåring.

Adonis siktar seg framleis inn på å bli leiande leverandør av program for lønshandtering og personallogistikk på store cruiseskipa.

– Jo større mannskap, for betre inntening. Det er eit heila puslespel på dei store cruiseskipa, og det er noko av det me hjelper reiarlaga med å organisera, forklarer trioen.

– Dei treng oss, det er ikkje berre me som treng dei, understrekar Per Ove.

Den hjelpa skal Adonis gje i åra framover også.

– Etter 36 år er me nøgde med prisen. I tillegg til at me har tru på desse også inn i framtida, seier Per Ove om Ripple Operations.

Bertine ser litt annleis på det.

– Det er eigentleg ikkje noko sum som er verd alle dei timane mamma og pappa har brukt på Adonis, men dette er noko me gjer for at arbeidsplassen skal bestå, sluttar ho.