Satsar på nærbutikken

Det er mykje som skjer på Spar Valen for tida. Butikken vert bygd ut, og ein ny generasjon tek over drifta for fullt.

Spar Valen utvidar innover i lokalet, og får i tillegg eit påbygg på den sida inngangspartiet er i dag. I påbygget vert det panteautomat, kundetoalett og kanskje nokre bord og ein kaffimaskin. I andre etasjen vert det kontor og eterom.

– Byggjer de ut for å få betre plass, eller vert det større vareutval?

– Begge deler, kanskje. Men først og fremst er det for å få plass til det vi ikkje alltid får plass til i dag. Vi skal over på ny profil, få nye kjølar og bakedisk, så butikken vert absolutt oppgradert, seier Nils Trygve Markhus.

 

Blir pensjonist

Mor hans Ingrid Bru dreiv den vesle Joker-butikken på Sandvoll frå 1988 og fram til ei stund etter at ho kjøpte butikken på Valen i 2003. Då slutta Nils Trygve i jobben på Valen sjukehus, og gjekk inn i drifta saman med mor si. Tre år seinare vart også bror hans Terje Bru Markhus med i familiebedrifta. Til sommaren tek gutane over for fullt.

– Eg blir pensjonist. På papiret i alle fall. Dei påstår at eg skal vekk frå lønsbudsjettet, ler Ingrid.

– Du kjem vel til å gå i hyllene?

– Ja, men det blir i tilfelle på dugnad, smiler ho.

– Kven blir sjefen no då?

– Vi er mange småsjefar i lag her. Men vi kranglar ikkje. Vi går kanskje inn på fryserommet og bannar av og til, men så går vi ut igjen, smiler Nils Trygve.

På papiret vert han butikksjef, medan broren Terje vert dagleg leiar. Mor og søner har kjøpt aksjane i tidlegare Varden Holding, og har no skipa aksjeselskapet Tinto Holding. Tinto er sett saman av førebokstavane i namna deira.

– Tint klang ikkje så godt, så vi la til ein o, seier Ingrid.

– Vino Tinto betyr vel raudvin på spansk. Det høver godt med hårfargen vår, spøkjer Terje.

Blid gjeng

Småsjefane på Spar Valen er samde om at dei har kjekke og blide medarbeidarar. Dei har vore medvitne om kven dei har tilsett.

– Vi var heldige og fekk Frank Mehl her. Han har ein god kommentar til alle, seier Ingrid.

– Vi prøver å gje den beste lokale handleopplevinga. Ein periode hadde vi til motto «du ringer, vi bringer». Vi leverer framleis mat både på Valen og Husnes. Men dei eldre på Sandvoll, dei kjem sjølv. Det er kjekt, det. Eg trur kanskje dei er litt sprekare der ute, humrar Nils Trygve.

Den blide gjengen meiner det er grunnlag for å satsa på nærbutikken.

– Det flyttar jo folk hit heile tida, og her likar mange seg. Det er noko med den trygge og oversiktlege skulevegen vår, den flotte skulen, barnehagen og sjukehuset. Det er mykje bra her, og så er det fint her. Så vi skal stå på vi, lovar Nils Trygve.