Satsar på døgnope og ubetent konsept

– Ideen kom for rundt eitt år sidan, som eit lite sideprosjekt. Me kom over dette på nettet, og det verka veldig spennande. Me syns samtidig at det var rart at liknande ikkje fanst i Norge frå før, seier Martin Kviteberg til Grenda halvanna veke etter at dei for første gong sleppte kundar inn i butikken på Damsgård i Bergen.

God start

29-åringen har saman med søstera starta på noko som dei trur kan blir eit landsomfemnande konsept.

– Det fungerer ved at kundane låser seg inn via Vipps. Butikken held ope 24 timar i døgeret, alle dagar i veka. Sidan lokalet er under 100 kvadratmeter held me også ope på søndagar. Kunden vel varer, skannar dei og betaler til slutt med kort eller vipps, fortel han enkelt.

Dei opna førre laurdag, og Martin meiner det har gått veldig bra så langt.

– Det har vore spesielt merkbart på søndagar. Me hadde 400 betalande kundar no sist, og det er ein god start. Det tar tid å byggja opp ein heilt ny butikk og kjede, understrekar Martin.

Kjeda har det dobbelbotna namnet Alltimat, og konseptet er etablert i Sverige med 50 butikkar der.

– Me trur dei fleste syns at konseptet gir meining. Det er som på tilsvarande søndagsopne butikkar, du skal finna alt du treng.

30 butikkar på fem år

Søskena har kjøpt seg inn i den norske delen av Alltimat og eig no 20 prosent av denne. Dei kjem til å vera aktive i delen som går på å marknadsføra kjeda, finna franchisetakarar og starta opp nye butikkar. Målet er 30 slike butikkar innan ein femårsperiode.

– 30 er eit veldig realistisk for oss, vurderer han.

– Viss me skal etablera fleire i vår regi, så blir det her vest i nærheita av oss. Me håper at kanskje nokon her i Kvinnherad kunne ha fatta interesse for dette, det er fleire bygder dette kan vera liv laga i. Det kan til og med drivast av ei velforeining, om det er interesse nok for dette for å sikra eit butikktilbod i bygda, meiner Martin.

Både Martin (29) og Bertine (24) jobbar i til vanleg i Adonis, på kontoret deira i Bergen. Han som systemspesialist, og Bertine er ansvarleg for marknadsføring.

– Men me er støtt og stadig heime på Halsnøy, forsikrar han.

Butikken på Damsgård driv dei då på sida av sitt vanlege virke.

– Det er ein ganske ny bydel, med mange unge bebuarar. Det er ei fin og urban gate, og ideell for konseptet vårt. Lang avstand til næraste søndagsopne butikk var med på å avgjera plasseringa vår. Me har satsa litt på å skilja oss ut med ferske brød og nysteikte bollar, forklarer han.

Flaggskip for kjeda

Dei har rekna med at butikkdrifta vil krevja rundt 50 prosent stilling no i starten, og ein kanskje kjem ned i 30% når ein er etablert.

– Me tenkjer at dette kan vera ei løysing ute på landet.

–`Kva investeringar krev dette?

– Me ligg på rundt millionen i oppstarten her, men det er ein ny og «fin» butikk, og har lagt litt i at dette skal vera eit flaggskip for kjeda. Me skal ha ein viss likskap mellom butikkane, men ein må ikkje vera heilt på dette nivået. Oppstartskostanden kan bli ein del lågare om ein har eit lokale passar til det, meiner Martin.

Butikken er neppe den første ubetente i landet, men Martin veit det i alle fall er den første døgnopne og ubemanna i Bergen. Opninga har fått pressedekning både hos Bergens Tidende og Finansavisen.

– Det er veldig spennande. Det er ikkje kvar dag ei ny kjede prøver å slå seg inn på den norske marknaden. Til no har det vore travelt med opninga for å få alt på plass. No byrjar det harde marknadsføringsjobben, seier Martin på ein måte som tyder på at han gler seg til det.