Satsar industrielt på lukka merdar

– Me har gått frå å vera veldig teknisk orienterte til å ha fokuset vårt på velferda til fisken. Og me har fått til eit konsept det no er stigande interesse for, seier Ole Bennæs til Grenda.

Han er partnar i Rosendal-baserte Nimoc Marine saman John Arne Olsen, og dei er saman med Westcon Hexacage. Dei utviklar eit sekskanta byggekloss-system som gjer at ein legg kan knyta seks til åtte lukka merdar saman med ei servicecelle i midten.

Fiskevelferd

Dagleg leiar i Westcon Hexacage Arne Matre melder om stor interesse for nysatsinga på lukka merdteknologi.

– Me opplever monaleg interesse for Hexacage-konseptet, ikkje berre frå oppdrettarar, men også frå dei spisse fagmiljøa innan fiskehelse, miljø og havbruksøkonomi, seier han i ei pressemelding i samband med satsinga.

– Me har ikkje konsesjonar, og har av den grunn ein eigen innfallsvinkel til å laga desse merdane. Lukka merdar har kontroll på lus. Vatnet blir pumpa frå eit djup der lusa ikkje er, og ein får med det heilt annan fiskevelferd i ei lukka merd utan lus, påpeikar Bennæs.

Designet til Westcon er eit resultat av krava til auka biologisk kontroll, og dei meiner konseptet sikrar høg kvalitet på oppvekstmiljøet til fisken.

Oppdrettsvolumet er 21.000 kubikkmeter per merd, og alt vatn blir filtrert for lus og larver. Eit dysesystem set riktig straum til vassmassane i forhold til det som er best for vekstfasen fisken er i.

– Me har fått tilgang til forsking som fortel kva som er ideell straum for best vekst hos laksen ved dei ulike storleikane. Det er difor gunstig å kunna regulera denne straumen, seier Bennæs.

Gjennom Rosendal-baserte Nimoc Marine er han og Jon Arne Olsen begge tungt involverte i utviklingsarbeidet og framdrifta til prosjektet.

Heilskapleg løysing

Hexacage er designa for å kunne driva med havbruk på eit industrielt nivå. Anlegget er testa til 8-9 meter høye bølger.

– Rømingsfare er eliminert og anlegget er ikkje påvirka av ytre faktorar. Det er nytt i havbruksnæringa å tenka stålanlegg med 40-50 års levetid. I ei verd med kontinuerleg utstyrsutvikling og stadige behov for oppgraderingar, er stål eit særs eigna materiale, meiner Matre og Bennæs, og stål er eit materiale Westcon i Ølen har levert storproduksjon innan i tiår etter tiår.

– Me skal ikkje eiga konsesjonar, men vera ein anleggsleverandør, seier Bennæs.

Han meiner deira merdløysing vil både gje stabilt, lusfritt oppvekstmiljø for fisken, der ein også sparer seg for vask av nót, reinsefisk og anna stress som påverkar fiskevelferd negativt.

– Me meiner å ha funne formelen for ei god, heilskapleg anleggsløysing. Og etter responsen å døma er det mange som ser disse kvalitetane, sluttar ein optimistisk dagleg leiar.