Satsar alt på å realisera draumen

Totalt er dei ein gjeng på 11 personar, sju aksjonærar pluss nokre andre som jobbar med det utanom, som no har starta denne bedrifta. Hybrosia.

Selskapet, som starta som eit enkeltpersonføretak, er no blitt til eit aksjeselskap, og i fylgje Lange har draumen lege der lenge.

– Prosessen med det har føregått over lengre tid, men så tenkte me at dersom me skal gjera dette så må me gjera det skikkeleg. Då kjentest det mest rett med eit AS. No er alle med, og alle er underforstått med at no er me i gang, seier Lange då Grenda møter han på arbeidsplassen hans for ein prat.

Fyrste steg

Lange jobbar nemleg også som speldesignar ved Sunnhordland Folkehøgskule, og det er også der han møtte fleire av dei han no jobbar i lag med på kryss og tvers av landegrensene.

– Fleire av dei som er med er også tidlegare elevar her. Nokre av dei blei med i etterkant av året sitt her, medan andre vart rekrutterte like etter at dei var ferdige. No jobbar me saman på kvar vår kant i ulike delar av både Norge og verda elles, men det er her i Kvinnherad me har bedriftsadressa vår, forklarer den daglege leiaren.

– Draumen er å kunne leva av å laga spel, men me må jo starta ein plass. Det å starta denne bedrifta var fyrste steg, men det har i grunn ikkje sokke heilt inn endå. Året så langt har vore veldig hektisk, og så starta me dette selskapet og plutseleg er me i gang utan at eg har rukke å ta det heilt inn over meg, fortset han.

Lange kan også fortelje at produksjonen av spel allereie har starta.

– Me har to spel som er under utvikling, og som me forventar ei delvis utgjeving av i løpet av året. Det er to ulike rollespel, eller det som me gjerne kallar penn og papir-rollespel. Det spelet som eg jobbar med heiter Under Shadow Of Night eller Under Nattens Mørke på norsk, og er eit mytisk skrekkspel som er sett til steinalderen. I spelet er ein då beskyttaren av folket du er ein del av og ein skal då løysa ulike problem, både vanlege problem men også overnaturlege problem, forklarer Lange.

Panikk

For alle som aldri har vore borti slike rollespel før forklarer Lange at det er i all hovudsak handlar om improvisasjon med ulike retningslinjer.

– Det er på ein måte eit improvisasjonsskodespel utan manus, berre at ein veit kven ein skal spela. Det er gjerne ein fire-fem spelarar pluss éin spelmeister som då er den som byggjer verda, fungerer som ein representasjon av menneska og vesena i den aktuelle verda og som så skapar sin historie, forklarer han.

– Det er veldig spanande, men det er ikkje noko som er nytt. Rollespela kom ei gong på 70-talet og blei ganske populært på 80-talet i visse kretsar. Den gongen forårsaka det litt panikk fordi samfunnet ikkje visste heilt kva det var for noko, og trudde ungdomane hadde byrja å kommunisera med demonar og overnaturlege vesen, ler han.

No er det derimot blitt mykje meir vanleg og midtstraums, spesielt etter populære tv-program som The Big Bang Theory og ikkje minst Stranger Things.

– No er det meir oppe i det «normale» samfunnet, og det er fleire ulike folk som spelar, både unge og gamle. Det er ikkje lenger ein nerdeting, seier Lange.

Klassisk fantasy

Lange fortel at han har brukt mykje av fritida si på å undersøkja både steinalderen og bronsealderen, og at han er svært interessert i historia til menneska generelt.

– Eg har i grunn alltid interessert meg for det og lurt på korleis ting eigentleg var før. Korleis var ungdomen i steinalderen? Var dei på mange måtar like som ungdomane i dag? Korleis såg dei verda og samfunnet, kva møtte dei der? undrar Lange engasjert.

– På den tida var det jo også mykje meir liv i skogane, mot no då dei er ganske tomme. Eg prøver å sjå på det i samband med vår forståing av det uforståelege, det mytiske og mystiske. Det å spinna historier og knyta seg sjølv mot det mytiske, for kva kom eigentleg fyrst? Historiene eller vesena i dei? fortset han.

Det andre spelet dei er i gang med er også eit rollespel, men i fylgje Lange fell det meir inn i den klassiske fantasy-kategorien.

– Det handlar meir om magi, alvar og andre vesen, eventyr og utforsking og er nok gjerne meir typisk fantasy. Me ynskjer derimot å produsera meir enn berre rollespel. Planen er å skapa, produsera og gje ut både brettspel og dataspel også, understrekar Lange.

– Det endelege målet er fysiske produkt, men der er me ikkje heilt endå. I år er målet å koma med ein digital versjon på pdf. Me har med oss fleire kunstnarar slik at spelarane kan få eit lite innblikk i verda det er snakk om. Me ser for oss at dette skal vera på plass i løpet av siste halvdel av 2024, legg han til.

Alle aldrar

Den engasjerte speldesignaren fortel at rollespel er noko han sjølv kjem til å halda på med heile livet, og er klar på at det absolutt er noko som passar for folk i alle aldrar.

– Det er ikkje berre sosialt og ein måte å vera kreativ på, men ein får også testa både seg sjølv og sitt eige tankesett. Terningen bestemmer jo mykje, men dersom talet på terningen blir lågt må ein sjå på eigne evner, problemløysa og ta stilling til ulike dilemma i intense situasjonar. Då gjerne om ting ein aldri ville fått høve til å oppleva elles, avsluttar han.