Samrøystes om konkurranse for kortvarig kontrakt

Fylkesutvalet hadde møte på måndag. Fylkesdirektøren la då fram ei sak der han bad om fullmakt til å kunngjera konkurranse og signera kortvarig kontrakt for båtruta Bergen-Sunnhordland, dette for å sikra fortsett drift i påvente av langvarig kontrakt.

Bakgrunnen for saka er at Skyss starta arbeidet med å førebu konkurransar for nye kontraktar for båtrutene Bergen-Sunnhordland og Rosendal-Bergen våren 2023. Men i oktober vart endra plan for gjennomføring lagt fram. Opphavleg skulle konkurranseutsetting for Sunnhordlandsruta skje i slutten av 2024 og Bergen-Rosendal før sommaren 2025. Det viste seg umogleg å halda på denne framdriftsplanen, og kunngjeringstidspunktet for kontraktane måtte difor skyvast til andre halvdel av 2026.

Fram til dess vil fylket utarbeida kostnadsestimat med ulike ambisjonsnivå knytt til klimautslepp, utarbeida forslag til verkemiddelbruk for å oppnå utsleppskutt, og kartleggja behov for infrastrukturtiltak og -investeringsbehov på kaiar.

«Fylkesdirektøren planlegg å leggja fram ny sak for fylkesutvalet i 2025 for handsaming av førebelse innspel, vurderingar og tilrådingar knytt til rutetilbodet, samt handlingsrom knytt til utsleppskutt», vart det opplyst.

Innanfor fullmaktene

Dagens kontraktar for båtrutene Bergen-Sunnhordland og Rosendal-Bergen utløper 31. desember 2027.

«Ved kunngjering av nye kontraktar i siste halvdel av 2026, kan desse fyrst ha oppstart i slutten av 2030. Dette har samanheng med tidsbruk knytt til gjennomføring av konkurranse og eventuell bygging av nye fartøy. Fylkesdirektøren vurderer 1. desember 2030 som sannsynleg oppstartstidspunkt for desse kontraktane», stod det i saksutgreiinga.

For å sikra fortsett drift på rutene er det behov for eigne kontraktar for den mellomliggjande fasen. Fylkesdirektøren tilrår at dei kortvarige kontraktane i hovudsak baserer seg på ei vidareføring av dagens krav. Det var berre kontrakt for båtruta Bergen-Sunnhordland som vart lagt fram for fylkesutvalet, medan Rosendal-Bergen har ein kontraktsverdi som ligg innanfor fylkesdirektøren sine fullmakter.

161 mill.

Kontrakten Bergen-Sunnhordland omfattar i alt fire fartøy. Ser ein bort frå lokalbåten til Austevoll, er estimert årsgodtgjering for kortvarig kontrakt på om lag 161 millionar kroner.

Fylkesutvalet vedtok samrøystes at fylkesdirektøren får fullmakt til å kunngjera konkurranse og signera kortvarig kontrakt for båtruta Bergen-Sunnhordland frå 1. januar 2028 til 1. desember 2030 med opsjon på å forlenga med 1+1 år.