Samrøystes om Eide Fjordbruk – delt om Mowi

Eide Fjordbruk har søkt fylkeskommunen om løyve til utviding av produksjonsanlegg og auka biomasse frå 2.340 til 5.940 tonn per lokalitet fire stader i Kvinnherad: Hisdalen og Hondskår ved Varaldsøy, Hågardsneset og Brandaskuta utanfor Snilstveitøy. Endringane skal skje i lukka merdsystem og med oppsamling av slam. Planane vekte begeistring i formannskapet på torsdag.

– Eg synest det er positivt at Eide Fjordbruk er så framoverlente at dei satsar på berekraftige løysingar med lukka merder, kommenterte Hege Lægreid Røssland (SF).

– Det er mykje positivt som skjer i denne næringa. Berre synd at det kjem så lite fram i media, meldte Ove Lemicka (Frp).

Det vart samrøystes bestemt å tilrå at Eide Fjordbruk får innvilga dei fire søknadane.

Meir alvorleg

Rett etterpå kom det opp ei liknande sak om Mowi. Dei ynskjer å auka biomassen frå 3.600 tonn til 4.680 på Utåker. For å motverka ein mogleg negativ effekt på villaksen, vil ein nytta storsmolt som gjev redusert produksjonstid i sjø, samt fortsetja med ein proaktiv lusestrategi.

Det eksisterande anlegget er basert på opne merdar, utan oppsamling av slam, og det skal ikkje endrast.

«Ein auke i produksjonskapasitet i eit slikt anlegg, vil føra til ein auke i tilført mengd slam i form av feces, spillfôr mfl. til fjordmiljøet kring anlegget. Den samla tilførsla av løyste næringsemne til fjordbassenget vil òg auka. Den planlagde produksjonsauken vil kunna medføra ein auke i tal individ på lokaliteten. Konsekvensen av eventuelle sjukdomsutbrot, lakselus eller røming vert difor òg meir alvorleg», står det i saksutgreiinga til kommunen.

Men det vert lagt til at lokaliteten har gode tilhøve for auke, dette grunna fordelaktige straumtilhøve i fjorden.

Ingen fagfolk

– Her er eg ikkje imponert, for å seia det mildt, sa Hege Lægreid Røssland i formannskapet. Ho fremja difor forslag å gje negativ uttale til søknaden. Røssland viste også til at det finst kommunar som har vedteke at dei berre vil ha lukka anlegg. Marit Årthun (KrF) var heilt samd, men dei to vart ståande åleine.

– Eg synest det er bra dei satsar, og det er gjort eit godt forarbeid. Ingen av oss er fagfolk, så vi kan ikkje seia at alt skal vera lukka anlegg. Vi skal vera veldig forsiktige med å påleggja næringa enkelte driftsmetodar, meinte Marianne Nordhus (Sp).

– Mowi driv òg med lukka anlegg, så det kjem, trudde Leif Sverre Enes (H).

Dermed vart det 7-2 for å støtta søknaden.