Samlar elevane på Valen neste haust: – No skal vi laga gode synergiar
Med stort fleirtal vedtok kommunestyret at alle elevane frå Utåker til Valen skal samlast frå hausten 2025. Om det blir bygd ny skule, eller om Valen skule skal rehabiliterast, er framleis uavklart.
Publisert
Sist oppdatert
Attende i 2022 vedtok kommunestyret å leggja ned Skarveland skule på Sandvoll, men det skulle fyrst skje frå 2027/28 når ny skule på Valen står klar. Men midlane som trengst er skubba på i økonomiplanen, slik at tidskravet ikkje kan oppfyllast. I tillegg har mange elevar søkt om skulebyte frå Skarveland til Valen allereie.
«Elevar på 1. trinn i Skarveland skulekrins har sidan vedtaket i 2022 søkt seg til Valen skule, difor vil Skarveland skule få stadig minkande elevtal dei neste åra, medan det totale elevtalet for begge krinsane innan 2026 vil liggja på det same nivået som Valen skule ligg på no. Dette gjer at ei vurdering av omgjering av vedtak frå 2022 om tidspunkt for samlokalisering bør sjåast på, med mogleg samlokalisering før ny Valen skule står klar», heitte det i saksutgreiinga til saka som kommunestyret fekk opp på torsdag.
Annonse
Kommunedirektøren la fram ei innstilling i to punkt:
1. Punkt 2 i vedtak i kommunestyret 24. mars 2022 som seier: «Skulen på Skarveland vart oppretthalden til ny skule på Valen står ferdig seinast 27/28» vert oppheva.
2. Kommunestyret ber administrasjonen greia ut om Skarveland skule og Valen skule kan samlokaliserast før ny skule på Valen står klar.
Krevjande
Annonse
Inger-Elin Nesheim (KrF) presenterte eit nytt forslag frå KrF, Sp og Høgre. Ho fortalde at Skarveland skule ligg an til å berre ha cirka 15 elevar til hausten. Valen skule har derimot aldri hatt så mange elevar som no, med 136 komande skulestart.
– No må vi ta signala frå FAU på alvor. Uvissa er krevjande. No er det tid for å prioritera barnefamiliane på sørsida, sa Nesheim.
Men ho la til at Valen skule er nedsliten og manglar universell utforming.
– Vi må snarast finna ut om Valen skule skal rehabiliterast, understreka ho.
Forslaget ho la fram inneheldt punkt 1 frå kommunedirektøren, i tillegg til eit endra punkt 2 og to heilt nye punkt. Dei lyder:
2. Skulane Skarveland og Valen blir samlokaliserte på Valen frå hausten 2025. Krinsgrensene blir endra i tråd med dette.
Annonse
3. Skulane skal inneverande år byrja arbeidet med å leggja til rette for best mogleg overgang for elevar og tilsette i samlokaliseringa. Byggtekniske tiltak må òg sjåast på i samanslåingsfasen.
4. Tidlegare vedtak om å byggja ny eller oppgradera Valen skule blir oppretthalde. Hausten 2024 må kommunen starta opp ein moglegheitsstudie for å kartleggja moglegheitene for ny rehabilitering av skulebygget på Valen, eventuelt nybygg for å husa elevane i krinsane Utåker, Sandvoll og Valen.
Tyngdekrafta
Frp kom med eige forslag. Det gjekk enkelt og greitt ut på å behalda Skarveland skule.
– Framstegspartiet har programfesta å oppretthalda skulane. Ved å gjera tiltak på Skarveland kan det verta ein livskraftig skule vidare. Valen skule treng omfattande rehabilitering, så viss vi fyrst skal ha ein strukturdebatt, så er det underleg at vi ikkje satsar på Skarveland og køyrer dit frå Utåker og Valen. Men det er vel tyngdekrafta som gjeld, sa Ove Lemicka.
Berre dei tre representantane til Frp støtta Lemicka sitt utspel. Deretter vart punkt 1, 2 og 3 frå KrF, Sp og Høgre samrøystes vedteke, medan nummer 4 fekk fleirtal med 28 mot 7 (inkludert Ap) røyster.
Annonse
Godt samarbeid
Til stades i salen var rektorane Frode Gaasdal frå Valen og Anne-Grethe Kjærstad Berge frå Skarveland. Grenda rakk eit ord med fyrstnemnde før dei gjekk.
– Dette var som forventa. No skal vi laga gode synergiar og ha eit godt samarbeid fram mot den samanslegne skulen i 2025, sa Gaasdal.
