Samla 120 til Rosa sløyfe-marsj

Det starta med oppvarming nedan for den nyaste av alle gamlebankane i bygda, før det kvinnedominerte toget gjekk i retning av Vangssago og Steinparken. Vel framme tok ein av initiativtakarane, Astri Måkestad, ordet. Ho rosa frammøtet og sa seg glad for å sjå kva einaste av dei.

– Kvifor er me her? Føret og fremst for å delta i aksjonen, som går kva oktober. Brystkreft er den vanlegaste kreftforma hos kvinner. 3500 kvinner og 30 menn får det årleg. Ein har ekstra fokus på brystkreft. Tidleg oppdaging kjernepunkt, og inntektene frå i dag går til forsking, og det me gir i dag i oktober og heile året kjem til hjelp, forsikra Måkestad.

Sjølvsjekk

Med eit publikum på 120 nytta Måkestad også høvet til å oppmoda dei kjenna etter i sin eigen kropp.

– Er me gode på å sjekka oss sjølve? Ikkje berre brysta, men også andre delar av kroppen? Alle endringar må takast på alvor, minna ho på.

Måkestad kunne også varsla at mammografibussen kjem tilbake, og rosa kreftsjukepleiar Marit Sjøvangen for jobben med å få det til.

– Bruk tilbodet når det er her! Bli sjekka, gjentok Måkestad.

– Eg brenn også for kreftomsorga. Det hadde vel ikkje vore eit ope møte om temaet om alt var bra? Mitt intrykk er at kreftomsorga i Kvinnherad kommune ikkje fungerer godt nok enno. Det er meir vanleg enn uvanleg at kreftoverlevarar får seinskadar, og mellom fleire ting lever dei med frykt for tilbakefall, forklarte Måkestad i appellen, og oppmoda samtidig sterkt om at ein i fellesskap måtte jobba for å få kreftkoordinator i 100 prosent stilling i Kvinnherad.

Før Rosa Sløyfe-deltakarane marsja vidare spelte Capojentene for dei frammøtte, og så kunne fredagsturen gå vidare for dei rosakledde.