Samde om ny tunnel og betre veg

Ordførarane frå Odda, Jondal, Kvam og Kvinnherad var i går samla i Rosendal for å sjå om dei kunne bli samde om felles innsats for å få rusta opp vegane i distriktet. Og det vart dei.

Førre gong dei møttest var i Jondal i byrjinga av november. Bakgrunnen for det møtet var at Jondalstunnelen AS var byrja å jobba for tunnel mellom Austrepollen og Nordrepollen, utan at Kvinnherad kommune var informert. Ordførarane frå Odda, Jondal og Kvam var begeistra for planane, medan Peder Sjo Slettebø og Hans Inge Myrvold frå Kvinnherad var betydeleg meir lunkne.

No inviterte Slettebø til nytt møte, for om mogleg kurera det som måtte vera av gruff.

– Som kjent vart vi ikkje einige førre gong. No har saka modna litt, og eg ynskjer å sjå om vi kan koma til ei felles forståing og om det er samferdsleprosjekt vi kan jobba saman for, sa Peder Sjo Slettebø (H) til Grenda før møtet starta.

 

Optimisme

Roald Aga Haug (Ap) frå Odda sa det slik:

– Eg møter her med optimisme, og er oppteken av å få gjort noko med samferdsla i regionen. Mellom anna er vegen mellom Odda og Rosendal, og for den saks til skuld Husnes, viktig for oss. Det same er vegen til Jondal og vidare til Kvam og Bergen.

For Jondal kommune møtte Jon Larsgard (Sp). Han var oppteken av at Folgefonntunnelen og Jondalstunnelen har vore til gjensidig nytte for kvarandre.

– Det har slått meg kor viktige desse tunnelane er internt, men også for regionen samla sett. Den eine er ikkje til hinder for den andre, slo han fast.

– Vi håpar å finna felles samferdsleløysingar som kjem alle til gode, sa Jostein Ljones (Sp) frå Kvam.

 

Konstruktive

Etter møtet snakka Grenda med ein nøgd Peder Sjo Slettebø. Han kunne fortelja om eit positivt møte.

– Vi er samde om at vi skal jobba i fellesskap for å få realisert flest mogleg vegprosjekt. Mellom anna skal vi jobba for å få utbetra vegen mellom Årsnes og Mauranger og ny tunnel mellom Austrepollen og Nordrepollen. Men fyrst skal alle ordførarane ta det opp med sine formannskap, for å sjå om det er grunnlag for å ta saka vidare til fylket, seier Slettebø, som varslar at det vert ei sak for formannskapet i Kvinnherad no på torsdag.

– Betyr det at du no går inn for den omsnakka tunnelen?

– Det er alltid ynskjeleg med samarbeid, og eg opplever at det no er ei større forståing for at det å få gjort noko med vegen mellom Årsnes og Mauranger er det viktigaste for oss. Når dei andre kommunane støttar oss i dette, så skal vi stilla oss konstruktive og positive til det tunnelprosjektet. Men eg må ta atterhald om at formannskapet er samd i dette, fortel Peder Sjo Slettebø.

Ordførarane var også samde om at det vidare arbeidet med tunnelen skal frontast av kommunane, ikkje av tunnelselskapet.