Samarbeider om valavis

– Me har blitt einige om å ha eit samarbeid om å laga ei valavis som skal informera kvinnheringane om dei ulike partia, fortel Ove Lemicka (Frp), som er ein av initiativtakarane til samarbeidsprosjektet.

Dei ni partia som stiller til val i Kvinnherad får éi side kvar til å fortelja kvifor deira parti fortener di stemme. Valavisa kjem ut 17. august, distribuert til alle i Kvinnherad som eit innstikk i Grenda den dagen.

Gunstig løysing

– Me trur dette er ein god idé, som vil gje ut god informasjon til innbyggjarane, og det gjer det enklare for partia, ved at ein får ein god distribusjon på valmateriellet i lag med avisa. Kostnads- og miljømessig er det også smart, legg Lemicka til.

Dei fleste partia kjem til å trykka opp færre partiprogram som konsekvens av dette.

– Me hadde minimalt med papirprogram å dela ut i 2019 også, og dette gjer det aktuelt å gjenta den strategien, seier Jostein Saghaug (MDG) om valavisa.

Også politikarveteranen Aslaug Hellesøy (KrF), som var ein annan av initiativkreftene til samarbeidet, syns valavis er ein god idé.

– Eg syns det er veldig fint at Grenda kjem med eit tilbod som dette, og det er ei økonomisk gunstig løysing for partia også. Me har sett den avisa dei hadde på Fitjar ved førre val, og me har høyrt at folk var veldig nøgde med ei slik avis. Me trur difor noko slikt vel vera bra i Kvinnherad også.

Trekning

Rekkefølgja annonsane kjem blir trekt, slik at det blir mest mogeleg rettvist. Ei fellesprosjekt som dette mellom dei politiske partia fortener honnør. Det viser at samarbeidsklimaet i kommunen er fruktbart, noko ein vonar det vil vera også når det skal forhandlast om taburettar og posisjonar etter 11. september.