Helsesista til Rosendal for å snakka om inkludering

16. oktober kjem Helsesista til Rosendal for å halda føredrag om inkludering og utanforskap blant unge. Tale Maria Krohn Engvik, som ho eigentleg heiter, har eit mål om å vera med å løfta psykisk helse for ungdom. Det er eit lokalt samarbeid mellom skule og organisasjonar som har klart å få ho til Rosendal.

– Me er veldig glade for engasjementet frå desse damene i helselaget. Dei skaffar pengar og gode føredrag, seier rektor Rune Melheim ved Rosendal Ungdomsskule.

Rosendal og Uskedal Helselag har teke initiativ til eit samarbeid med skulen om eit helse-relatert arrangement for unge. Sigrid Lunestad Opland og Ebba Hermann-Fossli representerer elevrådet, og meiner at temaet om inkludering og utanforskap er svært aktuelt.

Ingen seier hei

– Det skjer heile tida at nokon ikkje blir inkludert. Eg trur ikkje alltid at ungdommar ser at utanforskap oppstår, fordi ein er så oppteken av sitt eige, at ein ikkje alltid ser andre som ikkje blir inkludert, fortel Ebba.

– Det er jo ungdommar som går på fotballtrening og opplever at ingen seier hei til dei, fortel Rune Melheim.

Samarbeida mellom helselaga og skulen starta i fjor. Då var det «Kropp i fokus» som var tema, og dei fekk mellom anna inn Beate Anstensrud frå Olympiatoppen som heldt eit svært engasjerande føredrag om kropp og helse. Arrangementet er støtta av Sparebank1-stiftinga. Nytt av året er at Hatlestrand skule også er invitert, og at organisasjonen Romsleg har blitt med i arrangementskomiteen.

Fekk med seg Romsleg

– Me ville vera med fordi Romsleg jobbar for mangfald og inkludering, så dette passa veldig godt for oss, seier Jorun Larsen frå Romsleg.

– Eg sat attmed Jorun då pengane frå Sparebank1 vart delt ut. Så spurte ho meg om me treng 20 000 kroner ekstra for å få til føredraget. Det er klart, eg seier jo ikkje nei til det, ler Bente Haugen frå Rosendal Helselag.

Gunn Marit Vestvik Flatland i Rosendal Helselag er oppteken av temaet inkludering og utanforskap. Sidan ho arbeider innan psykiatrien, kan ho stundom sjå følgene av utanforskap i oppveksten.

– Utanforskap fører ofte til dårleg sjølvbilde, og det er ikkje så godt for helsa. Ein sluttar kanskje på skulen, men ein dreg med seg opplevingane derfrå resten av livet, reflekterer ho.

Også for vaksne

Føredragshaldaren Tale Maria Krohn Engvik var helsesjukepleiar i Oslo kommune i fem år før ho opna snapchat-kontoen «Helsesista». Denne har blitt svært populær, og Krohn Engvik spreier kunnskap om helse for ungdom, samstundes som ho brukar humor og personlege erfaringar. Helsesista skal halda føredrag for ungdomsskule-elevane på dagtid, men også ha eit kveldsføredrag for vaksne.

– Det er veldig viktig at foreldre også kjem til Samfunnshuset og får med seg dette, for haldningar vert gjerne påverka mest i heimen, seier Gunn Marit Vestvik Flatland.

– Me oppfordrar óg trenarar, og andre som har med ungdom å gjera, om å koma, avsluttar Rune Melheim.