Saman for Ukraina: Donerer rundt 110.000 kroner til Røde kors

9. mars gjekk Scana ut med nyhenda om at dei går inn for å donere 300 kroner for kvar av sine tilsette, for å støtte naudhjelpsarbeidet som Norges Røde Kors har sett i gong i Ukraina.

– Det er uendeleg trist å oppleva eit slikt brutalt angrep på fred, fridin og demokrati i Europa, som det vi no er vitne til i Ukraina. Menneskeliv går tapt, sivile blir råka, og dei humanitære behova er store over heile landet, melder Scana.

Verksemda ønskjer å stå saman med dei som er råka av krigen, og det gåvmilde initiativet har dei teke i felleskap med porteføljeselskapa deira. Samanlagt utgjer støtta deira rundt 110.000 kroner.

Håpar på monaleg støtte

– Dette er ein dråpe i havet, men er vi fleire som gjer det same, kan det verkeleg monne! Med ei felles kraftsamling i næringslivet, kan vi saman vise vår solidaritet til Ukraina og bidra til at håpet blir sterkare enn frykta, skriv dei.

Vidare er dei trygge på at givargleda er enorm, og Styrk Bekkenes, konserndirektør i Scana, nyttar difor høvet til å kome med følgjande oppmoding:

– Vi veit at givargleda der ute er enorm, og oppfordrar også våre kundar, leverandørar og samarbeidspartnerar til å hjelpe det ukrainske folket gjennom bidrag til ein av hjelpeorganisasjonane som er på plass i landet.