Saknar McDonald’s i Åkra

Dei seks elevane i 4.-7. trinn ved Åkra skule har hatt eit prosjekt i samfunnsfag i vår. Elevane har undersøkt kor mange som bur fast i Åkra og alder på personane i ei samfunnsvitskapleg oppgåve. Elevane tok på seg rolla som samfunnsvitarar.

«Dei har ringt rundt til personar i bygda og spurt etter alder. Somme visste dei allereie alderen på. I undersøkinga blei dei samde om å ikkje ta med feriefolk, kun fastbuande. Dei har heller ikkje talt opp folk som har folkeregisteradresse i Åkra, men bur vekke på til dømes skule. Dei har også berre talt personar som bur i sjølve bygda Åkra, det vil seia frå Brekke, inni bygda og ut til Vågen», opplyser kontaktlærar Anita V. Oppedal.

Flest eldre

Elevane hadde ein hypotese om at det er flest eldre i Åkra i alderen 60 år og oppover. Det viste seg å stemma. At det derimot ikkje er nokon fastbuande i aldersgruppa 18-25 år, kom litt overraskande på elevane, og dei prøvde å finna årsaka til dette.

«Det elevane då tenkte var at denne aldersgruppa reiser vekk på skule eller jobb sidan det ikkje er det i Åkra. Det er sjølvsagt feilmarginar. Likevel gir undersøkinga eit bra bilete på korleis alderssamansetnaden i Åkra er», fortel Oppedal.

Undersøkinga viser følgjande alderssamansetjing på dei 89 personane som skal reknast som innbyggjarar i Åkra, utifrå avgrensinga til elevane:

Alder: Tal

0-5: 6

6-13: 9

14-17: 2

18-25: 0

26-35: 9

36-45: 8

46-55: 7

56-62: 9

63-69: 18

70-80: 13

81-90: 7

90+: 1

Fordelt på kjønn er det 46 menn og 43 kvinner.

Spørjeundersøking

«Det var fleire kompetansemål elevane arbeidde med i oppgåva. Dei fekk prøva seg på rekneark (Excel) og digitale verktøy, dei måtte bli samde om kven som skulle vera med og korleis dei ville framstilla undersøkinga. I etterkant av undersøkinga hadde dei nokre spørsmål. Dei spurte då om kva som er bra med Åkra og kva personane saknar i Åkra», informerer kontaktlærar Vindenes.

Her er kva tre av elevane svarte i sistnemnde undersøking:

Kjersti Vågen (10 år)

Kva er bra med Åkra? Butikk og at me har nokre badestrender.

Kva saknar du i Åkra? Eg saknar meir folk, ungdomsskule, McDonald’s/Burger King, eit stort svømmebasseng og Gokart-bane.

Benjamin Hodzic (10 år)

Kva er bra med Åkra? Lite trafikk, butikk, at vi kan bade i sjøen og har kort veg dit, gode akebakkar om vinteren er det òg.

Kva saknar du i Åkra? Basseng, McDonald’s og ungdomskule, kino hadde òg vore bra.

Odin Sørheim (12 år)

Kva er bra med Åkra? At det ikkje er for mykje folk, butikk, lite trafikk. Det er ganske «fritt», du kan gjera nesten alt du vil!

Kva saknar du i Åkra? Cross-/rallybane.