Sakna eit tilbod: Tek saka i eigne hender

– Det kan ofte vera litt vanskeleg å få relasjonar når ein er blitt vaksen. Vårt mål er å skapa eit samlingspunkt for unge vaksne mellom 18-36 år, for det er der me ser at behovet er størst. Per i dag finst det ingen tilbod til denne aldersgruppa her i Kvinnherad, seier Christina Hasle Bøe der me sit i sofaen inne i Frivilligsentralen sine lokalar på Husnes.

Dette ville Bøe og dei andre damene gjera noko med, og saman gjekk dei i lag for å starta opp Mental Helse Ung og Fredagsklubben. Arrangementet Fredagsklubben kjem til å vera i regi av Mental Helse Ung som igjen er ei grein inn under Mental Helse Kvinnherad.

Ingen grenser

– Dørterskelen for å koma seg ut kan vera veldig høg for mange. Det kjenner jo enkelte av oss på sjølv også, men me veit at når me kjem oss ut så får me det veldig gøy. Sjølv om ein kjenner på mykje spenning og nervøsitet i møte med nye folk, så er det jo så gøy når ein då «klikker» skikkeleg med nye kjenningar, seier Bøe vidare.

Saman med oss i sofaen sit også Renate Olderkjær Kolaas og Maria O. Hardeland, som er to av dei totalt fem initiativtakarane som er med på prosjektet.

– Me vil at me i lag med alle som kjem hit kan laga dei fredagskveldane som folk har lyst på. Om det er filmkveld, tacokveld, ein temakveld om noko som engasjerer oss, spelekveld eller kanskje det er nokon som brenn inne med eit eller anna som dei har lyst til å læra vekk til oss andre, fortel Kolaas.

– Kanskje me også kan få til eit LAN etter kvart som me veks skikkeleg. Det kjem til å bli ein kveld som blir litt til etter kvart som me kjem i gong, men det er i grunn ingenting som set grenser. Aller fyrst skal me derimot ha eit stiftingsmøte. Då startar me opp Mental Helse Ung som ein organisasjon med styret og alt slikt, poengterer Bøe.

Bøe understrekar også at dei gjerne ynskjer å få fleire menn med på laget.

– No er me fem damer som har lyst til å få til dette, men me har også veldig lyst til å få inn menn i dette her, fortel Bøe.

– Terskelen er nok ofte litt høgare for menn å gå på slike ting som dette, det ser ein eigentleg i alle aldrar. Så dei vil me også gjerne ha med oss, legg Hardeland til.

Damene understrekar også at dette skal vera eit rusfritt arrangement.

– Dei som kjem hit skal få kjenna på den tryggleiken, at det skal vera koseleg og behageleg, seier Bøe.

Med eit smell

– Kvifor set de i gang med dette akkurat no?

– Behovet har vore der i mange år, og Mental Helse Kvinnherad har prøvd å sparka dette i gang i lang tid, men det har liksom aldri kome skikkeleg i gang. No er me to stykk her som også er med i det hitt styret, i tillegg så er det eit par andre som sit i ein annan organisasjon som har vore med på å få ballen til å rulla, forklarer Bøe.

– Me har vel alle kjent litt på den einsemda innimellom, kjent litt på dei utfordringane ein kan møta på. Så me veit også behovet for det og viktigheita av det, legg Kolaas til.

Dei driftige damene er glade for å vera i gang.

– Me er fem damer som verkeleg brenn for dette. Fyrste møte blir fredag 24. november og me ynskjer at flest mogeleg tek turen slik at me kan starta med eit smell. No har me sparka det i gang og dette her blir råkult, avsluttar Bøe.