Sakna applaus for dei som slutta i politikken
Etter valskredet for Industri- og Næringspartiet (INP), kom Heidi Bolette Jakobsen inn i kommunestyret. Men éin ting reagerte ho på i det fyrste møtet.
Eitt nytt parti marsjerte torsdag inn i kommunestyret i Kvinnherad for fyrste gong. INP fekk heile fem mandat, og sidan dei også hadde fem kumulerte på lista, gav det seg sjølv kven som sikra seg plassane. Heidi Bolette Jakobsen stod på fjerde plass, men etter at personrøystene var talde opp, avanserte ho til tredje.
Heidi er frå Høylandsbygd, slik tilfeldigvis også vårt andre intervjuobjekt etter møtet, Kristoffer Tufta frå Høgre, er.
Artikkelen held fram under annonsen.
– Eg skal faktisk arrangera loppemarknad saman med han på Hauge skule på laurdag. Det er fleire lag og foreiningar som går saman om arrangementet, og vi skal mellom anna selja ting frå skulen og barnehagen, så som gamle kart og bøker, fortel Heidi Bolette Jakobsen, som i denne samanhengen representerer Langaneset Velforening, der ho er leiar.
Barn og unge
Ho fylte 50 år i sommar, og jobbar til dagleg på Øyatun skule, både som spesialpedagog og rådgjevar for 10. trinnet.
– Hadde du sett for deg å hamna i kommunestyret?
– Eg håpa jo det. Eg vart med i politikken fordi eg har lyst til å utgjera ein forskjell. Men ein veit jo aldri, for det er veljarane som bestemmer, kommenterer ho.
Jakobsen blir no 2. vara for INP i formannskapet. Men viktigare er det nok at ho også får fast plass i levekårsutvalet.
– Eg hadde eit håp om å koma i levekår, for sakene der er veldig viktige for meg, seier ho.
Ho utdjupar:
– Eg brenn for barn og unge, det ligg hjarta mitt nært. Alt som handlar om omsorg synest eg er kjempeviktig, slår ho fast.
Artikkelen held fram under annonsen.
Utan applaus
Men både Heidi Bolette Jakobsen og resten av INP reagerte på éin ting i kommunestyret på torsdag. Då vart både ordførar Hilde Enstad (Ap) og varaordførar Leif Sverre Enes (H) takka av etter lang og tru teneste. Men det skjedde til absolutt tystnad, utan noko form for applaus. Som Enstad sjølv har presisert fleire gonger dei siste par åra, er det ikkje lov å klappa i kommunestyret i samband med handsaming av saker.
– Vi synest det er unormalt at nokon som sluttar i jobben sin etter fleire år, ikkje skal få ein klapp. Det burde vera lov. Det er jo folk det handlar om, og ein må kunna visa at ein set pris på dei. Det er utruleg viktig, synest eg, opplyser Heidi Bolette Jakobsen, og varslar at INP mogleg vil fremja eit forslag om løysa litt på reglane.