Såg Rødt etter kjærleikssorg

Standpunktet partiet Rødt har til saka er nemleg dette: «Rødt sier nei til utbygging av ny vindkraft i Norge, både på land, i fjæra og til havs.» Dette kan den tidlegare Venstreveteranen stilla seg bak.

Kjærleikssorga Ekeland har frå brotet med Venstre er reell, og ho kjenner seg avvist at det partiet ho har støtta og fremja politikken til i 31 år.

– Det er jo heilt tragisk dette med Venstre. Eg har prøvd å få dei til å forstå at vindkraftsaka ville vore ei sikker politisk sak, med all den motstanden som er mobilisert i dette spørsmålet. Men dei har ikkje høyrt på meg. Det er dei som har tvunge meg ut, fortel ho oppgitt.

Sjølv om ho no vil røysta Rødt, har ho enno ikkje sett seg heilt i programmet deira. Likevel er det fleire av kjernesakene deira som ho har null problem med å seie seg samd i.

– Utjamningspolitikken deira stiller eg meg lett bak. Rødt er dessutan eit parti som tar kjapt tak i problema, der har Moxnes vore særskilt flink å peike på og ta tak i urettferd med ein gong. Dei vil bevare Noreg som det er, og ikkje tillata noko kaksesamfunn, samanfattar ho.

Vil kunne utgjera ein skilnad

Det er fleire parti som stemmer blankt nei til vindkraft, men det er likevel dette partiet som vart vurdert som mest tenleg å røysta på for Ekeland.

– Veit du at det er 22 parti som stiller til val på Stortinget til hausten? Med så mange små parti er det umogleg å få gjennomslag, stemmene våre vil bli forvitra. Men Rødt er eit parti som no ligg an til å kunne få inn fleire kandidatar, Terje Kollbotn frå Odda har også sjans, og då er dette eit parti som kan få gjennomslag for politikken dei fører. Men eg heiar jo på dei andre partia også, ler Annemor solidarisk.

Ekeland tykkjer det er påfallande at det er heilt tyst i vindkraftsaka no om dagen, og kallar temaet eit politisk tabu. Ho meiner politikarane freistar å tie problematikken i hel no før valet, fordi det er så stor motstand til det denne utbygginga representerer.

– Så det er viktig at det kjem nokon inn på stortinget som kan slå ned på dette. Rødt har dessutan vist å det er eit samsvar i det dei seier og det dei gjer. Det er mange parti som seier ein ting og gjer noko anna, påpeikar ho.

Målretta engasjement

Ein vil likevel ikkje sjå det same politiske engasjementet for Rødt som Annemor tidlegare har vist for Venstre. Ho understrekar kor engasjementet hennar vil finna stad framover:

– Eg skal nytta all min energi i å halda Kvinnherad fri for vindmøller. Og så skal eg vatna urtene mine, ler ho.

Den lokale rørsla «Nei til Vindmøller» kan mobiliserast på kort varsel, og dersom det er vindkraftpositive politikarar som vil halda stand i nærleiken framover, treng dei ikkje bli overraska om det troppar opp ei kortreist aksjonsgruppe. Gruppa er nemleg alltid førebudd.

– Vi er klare til å rykke ut på kort varsel. Eg har t-skjortene våre her, og det nye banneret vårt ligg klart!

Det neste store målet til aksjonsgruppa er å få alle partia til å ta (riktig) standpunkt til vindkraft, og formidle dette i partiprogramma sine før kommunevalet om to år.

Skal på veggen

Det var BT som først omtala denne saka. Avisa fekk i dette høvet Annemor til å bryta løftet sitt om å aldri setja sin fot i Fitjar vindmøllepark. For den gode saka køyrde ho nemleg likevel opp i Fitjarfjellet, kor ho vart fiksert på fleire fotografi med vindmøllene ruvande i bakgrunnen.

Gjennom ei årrekkje har avisartiklar om Annemor sitt engasjement, frå all slags samanhengar, blitt dokumentert på toalettet i leilegheita hennar i Klubbavikjo. På spørsmål om også vindmøllefotografia vil få veggplass der svarar ho dette:

– Det vil det. Garantert!