Sævareid er ny økonomisjef i Seistar
Eirik Sævareid (45) frå Husnes, er tilsett som økonomisjef i rederiet Seistar, som har base på Torangsvåg i Austevoll, melder Kyst.no.
Publisert
Sist oppdatert
Sævareid starta i den nye jobben som økonomisjef 1. september. Han fortel til nettstaden Kyst.no at jobben i Seistar freista, då det er eit selskap som arbeidar innanfor havbruksnæringa, har hatt vekst, samstundes som det har levert solide resultat.
– Eg vonar å kunne bidra til at selskapet held fram den fine utviklinga også i åra framover. Oppstarten har vore fin, og eg har blitt tatt godt i mot. Dei fyrste vekene har eg brukt til setja meg mest mogeleg inn i selskapet, i rutinar og prosessar, fortel Sævareid.
Annonse
Sigbjørn Stangeland, dagleg leiar i Seistar Holding seier til Kyst.no at han ser veldig fram til å samarbeida med Eirik.
– Me er glade for at me har fått med på laget ein person med så stor fagleg tyngde, erfaring og positiv personlegdom, seier Stangeland.
Variert bakgrunn
Brønnbåtreiarlaget Seistar i Torangsvåg på Austevoll er eigd av Lerøy Seafood Group (50 %) og Brødrene Bakke (50 %), og har totalt kring 95 tilsette, der dei fleste er maritimt personell.
Annonse
Sævareid har variert erfaring frå ulike industriverksemder, og dei siste 15 åra har han jobba i ulike økonomileiarstillingar, mellom anna i Eqva (Havyard), Noreq, Harding Safety og Hordafor, altså skipsverft, industri og fiskeri- og havbruksrelaterte verksemder. Sundebuen kjem frå stillinga som finansdirektør i Eqva (tidlegare Havyard Group).
– I Eqva er det etablert eit konsern som leverer gode resultat innanfor industri og utvikling av småkraftverk – og som etter mi vurdering har stort potensial for vidare vekst. Tida i Eqva var hektisk og spennande, og eg kjem til å følgja selskapet tett frå utsida framover, opplyser han, i følgje Kyst.no.
45-åringen er utdanna siviløkonom, og har ein master i økonomi og administrasjon frå Norges Handelshøyskole (NHH). Han har dei seinare åra teke vidareutdanning i finans (Autorisert Finansanalytikarstudium og fordjupningsstudium i Corporate Finance) på NHH.
Sævareid får ansvaret for økonomi- og finansfunksjonen i Seistar-konsernet, innunder dette mellom anna rekneskap, rapportering og finansiering. Sævareid fortel han har ein klar ambisjon om å bidra til å vidareutvikla Seistar i åra som kjem.
