Sådde spirer av engasjement
15. februar hadde Ølve og Hatlestrand Bygdautvikling invitert lag, organisasjonar og næringsaktørar frå Ølve, Varaldsøy og Hatlestrand til informasjonsmøte om Liv og Lyst-prosjektet «SÅ».
Publisert
Møtet gjekk føre seg i gymsalen på Hatlestrand skule, og om borda ikkje var smikkfulle, var iallfall oppmøtet godt.
SÅ-prosjektet vart søkt om i oktober 2021, og i desember vart det innvilga som eit eittårig forprosjekt i Vestland fylkeskommune sitt Liv og Lyst-program. Prosessen vidare er å jobbe fram satsingspunkt for eit hovudprosjekt, og tysdagens samling var eit startledd i dette arbeidet.
Annonse
Korleis gjera bygdene meir attraktive?
Olve Vangdal, leiar i Ølve og Hatlestrand Bygdautvikling, ynskja forsamlinga velkommen.
– I dag skal me snakka litt om kvifor Ølve og Hatlestrand Bygdautvikling vart etablert, sei litt om kva me prøver på å få til, og me skal prata litt om SÅ-prosjektet. Kommunen, ved Karin Thauland, skal sei nokre ord om Kvinnherad si rolle inn i dette prosjektet. Når ho er ferdig skal me setja opp ein workshop, kor me drøftar korleis me kan utvikle bygdene våre for å gjera oss meir attraktive, sa han.
Med seg frå laget hadde Vangdal John Ulvenes, Bjørn Henning Nepstad og Jarle Andresen. Garry Svindland er også med i Ølve og Hatlestrand Bygdeutvikling, men var ikkje til stades denne kvelden. Elise Marie Stava Vangdal, kona til Olve, spela også ei rolle i presentasjonen av SÅ-prosjektet.
Annonse
Ho peika mellom anna på kva Liv og Lyst-programmet går ut på.
– Attendemeldingane frå dei ulike laga er at det kjennest som å sitje på kvar si tue, der ein prøver å få til ting åleine. Det er stort engasjement, men det er kanskje lettare å få mobilisert når ein gjer noko saman. Liv og Lyst-programmet er som eit stillas eller støttenettverk, der dei som vil ha utvikling kan danna eit nettverk og samlast, og bruka kvarandre som støttespelarar, forklarte ho.
Vil snu innbyggjarstatistikken
Tanken bak prosjektet er å skapa vekst og positivitet i bygdene, samt å oppretta eit tettare samarbeid mellom desse. Hovudgrunnen til at initiativet er teke er den fallande statistikken på innbyggjartala.
– Bygdene våre har størst nedgangen i folketalet i Kvinnherad, og statistikken er dårleg kvart år. Denne trenden må me få snudd, slo Olve fast.
SÅ-prosjektet vil vonleg kunne bidra til å gjera bygdene meir attraktive, og med det vera med på å endra trenden.
Annonse
– Det å få inn ein positivitet er mogleg det viktigaste med desse liv og lyst-prosjekta. Me skal vera bygdene som ikkje blir gløymt. Auke og vekst kan jo godt skje på denne sida òg, meinte Olve vidare, før fleire av ressursane desse bygdene sit på vart trekt fram.
«Me ynskjer å SÅ fleire spirer – slik at vekst, trivnad, engasjement, bulyst, samarbeid, identitet og utvikling skal få eit breiare og meir fruktbart område for å vekse. I bygdesamfunn der landbruket og bøndene har sådd spirer i lang tid. Det fleire eldsjeler, frivillige og bygdefolk har forvalta spirer og fått dei til å gro før oss, slik at me i dag har eit solid grunnlag og kan hauste frå lokalsamfunna som har mykje å by på.» Frå Liv og Lyst-søknaden.
Utnytte og marknadsføre potensialet
Jordbruksareal med mykje ubrukt potensiale, flotte turmål og naturområde, ein sterk og veksande industri, eit godt og aktivt lagsliv, gode oppvekstvilkår, og ferjefritt til Bergen.
Eitt av spørsmåla som vart reist på møtet var korleis ein kan marknadsføra alle desse faktorane ut til potensielle tilflyttarar, og til dei som mogleg har forvilla seg vekk frå desse Varaldsøy, Ølve og Hatlestrand, samt kva som skal gjerast for å behalda ungdommen.
Dei som møtte opp denne kvelden vart oppfordra til å presentere seg sjølv. I løpet av denne runden vart det tydeleg at dei fleste hadde mange hattar i lokalsamfunnet, noko som er eit sikkert teikn på at det finst engasjerte eldsjeler i alle dei tre bygdene som var representert.
Bustadar er viktig
Annonse
Då gruppearbeidet kom i gong, spegla difor ideane som vart lagt på bordet eit breitt perspektiv på kva som må til for å gjera bygdene meir attraktive. Viktige stikkord frå gruppa Grenda følgde, «Gruppe Kim», var å tilby arbeidsplassar, bustadar og varierte sosiale arenaer.
Gruppa ynskja også å setje større fokus på alle tinga som er positivt med bygdene, der mellom anna volleyballmiljøet, samt dei gode resultata som Hatlestrand oppvekstområde kan skilta med, vart trekt fram som gode døme.
– Det er mykje positivt her, men me må bli flinkare å få det ut til folk. Folk må ha ein stad å bu, og me må ha arbeidsplassar å tilby, slo Erling Boland fast.
Boland var på plass som representant frå Bygdadrøso, og er elles dagleg leiar i Boland Invest. Som dei fleste andre representerte han såleis både eitt og hitt denne kvelden.
Rundt same bord sat Reidun Grønevik (Hatlestrand og Ølve Turlag), Kim Røssland (Herde Kompositt, Strand-Ulv IL), Tore Vikane (Ølve Montessoriskule) og Jan Magnus Aasen (Ølve Industrier). Røssland var samd i det Boland peika på.
– Ja, me er nøydd å ha bustadar på plass, slik at me kan husa dei som jobbar hos oss, understreka han.
Annonse
La fram gode idear
Aasen meinte mellom anna at bygdene kunne hatt godt av ein sosial møtestad, og som gruppa sin referent noterte han ned «Kafe/pub» på lista. Vikane meinte ein kanskje burde leggja til rette for fleire aktivitetar, slik at ein også kunne treffa dei som ikkje let seg engasjera av idrett, og hadde også ei forslag om ein type felles-slakteri, kor lokale jegerar kan handsama kjøtet for å dernest selja lokalt hjortekjøt i butikken.
– Eit slikt slakteri kjem nok på rundt millionen, men det har også vore ein kjepphest i Fusa, poengterte Vikane, til stor begeistring frå dei andre.
Det gruppene drøfta seg fram til denne kvelden vil bli teke med vidare, mot det som skal munna ut i eit hovudprosjekt. Her skal stemmene frå alle bygdene vera med på å danna eit grunnlag for det vidare arbeidet.
