Sa nei til forslag om turistskatt
Kommunestyret og kommunedirektøren er ikkje nøgde med regjeringa sitt framlegg til turistskatt. – Lir av hastverk og lastverk, vart det sagt.
Publisert
Regjeringa har sendt på høyring eit framlegg til lovheimel for frivillig kommunal innkrevjing av besøksbidrag frå overnattingsgjester, også kalla turistskatt. Saka var oppe i Kommunestyret før jul.
«Kommunen bør vera positiv til at det vert lagt opp til auka inntekter frå turisme som kan gå til finansiering av fellesgode. Dette kan bidra til ei betre oppleving for turistane, men også til at lokalbefolkninga får tilgang til betre fasilitetar og meir tilrettelagd infrastruktur innanfor fritids- og rekreasjonsområdet», stod det i saksutgreiinga, der det også vart vist til at slike besøksbidrag finst i fleire andre europeiske land.
Annonse
Kommunedirektøren vurderer at inntektspotensialet for Kvinnherad kommune er om lag 6 millionar kroner årleg. Det er kommunane som eventuelt sjølve bestemmer satsen for besøksbidrag, men maksgrensa er 5 prosent av total pris for overnattinga.
Framlegget gir ikkje heimel til å krevja inn avgifter frå cruisepassasjerar, bussturistar på dagsbesøk, bubilturistar som ikkje nyttar tilrettelagd bubilparkering, eller villcamping. Samstundes er det slik at alle som betalar for overnatting, også vil måtta betala besøksbidrag.
«Noregsferie og arbeidsreiser vil med andre ord bli noko dyrare», vert det slege fast.
Mykje uheldig
Annonse
Alt teke i betraktning la kommunedirektøren fram eit innstilling der ein går i mot regjeringa sitt forslag slik det ligg føre no.
«Kommunen meiner det må utgreiast ei ordning som treff breiare, og som er enklare å administrera for både næringslivet og kommunane. I alle høve burde besøksbidrag frå cruisetrafikken vore utgreidd før framlegget vart sendt på høyring», står det.
Per Harald Havnen Löfgren Johansen (Ap) var heilt samd.
– Diverre lir dette forslaget av hastverk og lastverk. Det er mykje som er uheldig med forslaget. Men ein slik type lov har verkeleg noko for seg, slik at dei besøkjande gjev noko tilbake til området dei besøkjer, analyserte han.
Ove Lemicka (Frp) var kome til same konklusjon.
– Dette blir ein ekstra kostnad for næringslivet med inntil 5%, i tillegg til moms. Dette er berre ein ny skatt som blir innført. Cruise og camping burde vore med, sa han.
Annonse
Banka igjennom
Wermund Vetrhus (SV) tykte høyringsfristen var for kort.
– Her har ein ikkje tankar om reell medverknad. Her har ein eit lovforslag ein har tenkt å banka igjennom, sa han.
Vetrhus føreslo å be om utsett frist, i tillegg til å lansera nokre andre moment, men fekk berre 12 røyster for det. Innstillinga vart vedteken med 22 røyster.
